Meta beda jintlagħab it-tieni leg tal-Aħħar 16 tal-UEFA Champions League, Bayern Munich u Paris St-Germain saru l-ewwel żewġ timijiet li kkwalifikaw għall-kwarti-finali meta għelbu lil Lazio u lil Real Sociedad rispettivament.
Bayern Munich.. 3
Lazio…………….. 0
(Agg: Bayern M. 3-1)
Bayern Munich laqgħu lil Lazio u rebħulhom bl-iskor ta’ 3-0 għal aggregate ta’ 3-1.
Kienu Bayern li ħarġu fuq l-offensiva u kmieni fil-partita resqu viċin minn Harry Kane u Jamal Musiala.
Peró, l-aħjar ċans wasal għand Lazio meta, fis-37 minuta, il-ballun wasal għand Ciro Immobile u waħdu quddiem il-goalkeeper, Manuel Neuer, falla l-mira bir-ras.
Ta’ dan in-nuqqas Lazio pattew qares għax żewġ minuti wara, Bayern fetħu l-iskor mis-solitu, Harry Kane meta Thomas Muller xeħet bir-ras lejn Raphael Guerreiro li ma laqatx sew il-ballun li wasal għand l-attakkant Ingliż u bir-ras kien pront jixħet il-ballun fix-xibka.
U fil-ħin miżjud tal-ewwel taqsima, Thomas Muller irdoppja permezz ta’ daqqa ta’ ras.
Fis-66 minuta, Kane għamilhom tlieta b’xutt qawwi filwaqt li erba’minuti wara, Musiala laqat il-lasta.
Real Sociedad……….. 1
Paris St-Germain ….. 2
(Agg: Paris SG 4-1)
Paris St-Germain marru għand Real Sociedad u għelbuhom 2-0 għal aggregate ta’ 4-0.
Il-Pariġini ma setgħux kellhom bidu aħjar meta, fil-15-il minuta, huwa fetħu l-iskor meta Kylian Mbappe rċieva mingħand Ousmane Dembele, dar mad-difensur avversarju, Igor Zubeldia, u b’xutt fil-baxx minn pożizzjoni angolata għeleb lill-goalkeeper Alex Remiro.
Kien goal li prattikament qata’ l-passaġġ tal-Franċiżi mal-aħħar tmienja minħabba l-aggregate kien dak parzjali ta’ 3-0 biex l-Ispanjoli kellhom muntanja quddiemhom x’jissuperaw.
Aktar minn hekk, il-Franċiżi komplew jiddominaw u fis-56 minuta, l-istess Mbappe rdoppja meta kkonkluda mill-cross ta’ Lee Kang-In.
Ir-reazzjoni tal-Ispanjoli waslet tard hekk kif minuta mit-tmiem huma naqqsu l-iskor minn Mikel Merino liema goal xejn ma nkwieta lill-Franċiżi.
