Meta llum u għada tintlagħab is-sitta u l-aħħar ġurnata tal-Fażi tal-Gruppi tal-UEFA Champions League, jonqos erba’ timijiet oħra biex ikun komplet ir-round tal-Aħħar 16.
S’issa t-12-il team li kkwalifikaw huma, Arsenal, Atletico Madrid, Barcelona, Bayern Munich, Borussia Dortmund, Inter, Lazio, Leipzig, Manchester City, PSV Eindhoven, Real Madrid u Real Sociedad.
Barra minn hekk iridu jkun magħrufa wkoll it-tmien timijiet li se jilagħbu fil-UEFA Europa League.
S’issa Feyenoord u Young Boys biss huma aċċertati li fir-round li jmiss se jilagħbu f’din il-kompetizzjoni.
Intant, l-aktar grupp interessanti huwa dak A, minħabba li hemm tliet timijiet li qed jimmiraw li jtemmu fit-tieni post.
Filwaqt li Galatasaray imorru jilagħbu għand Copenhagen, Manchester United jilqgħu lil Bayern Munich.
Id-destin tal-United ma jinsabx biss f’idejhom. Huma jikkwalifikaw biss jekk jegħlbu lil Bayern Munich u l-partita l-oħra tintemm fi draw.
Jekk il-partita bejn Copenhagen u Galatasary ikollha rebbieħ, Manchester United jistgħu jispiċċaw fit-tielet post u jmorru jilagħbu fl-Europa League.
Jekk min-naħa l-oħra ma jirnexxielhomx jegħlbu lil Bayern, ir-Red Devils jiġu eliminati minn kollox minħabba l-inferjoritá tal-konfronti diretti kontra Copenhagen u Galatasaray.
Minkejja li l-pressjoni tinsab kollha fuq it-team immexxi mill-manager, Erik ten Hag, u l-moral jinsab baxxa wara t-telfa ta’ 3-0 kontra Bournemouth fil-kampjonat, huma se jilagħbu kontra avversarji li ġejjin minn umiljazzjoni ta’ 5-1 kontra Eintracht Frankfurt fil-Bundesliga.
Barra minn hekk it-team Ġermaniż ma għandu l-ebda motivazzjoni għal din il-logħba għax huwa aċċertat mill-ewwel post.
Minn Grupp B, Napoli jonqoshom punt biex jikkwalifikaw meta jospitaw lil Braga li jinsabu tliet punti taħthom.
Għalkemm fil-football jista’ jseħħ kollox, se tkun diffiċli għat-team Portugiż biex jissupera dan l-ostaklu.
Dan minħabba li jridu jirbħu b’vantaġġ ta’ żewġ goals wara li f’darhom ħarġu telliefa kontra l-istess Partenopei bl-iskor ta’ 2-1.
Grupp F għadu miftuħ beraħ hekk kif Paris St-Germain, Newcastle u Milan, qed jissieltu għat-tieni post bid-differenza ta’ bejniethom hija dik ta’ żewġ punti biss.
Paris St-Germain imorru jilagħbu għand Borussia Dortmund li rebħu l-grupp.
Rebħa tibbukkja post lill-Franċiżi mal-Aħħar 16.
Riżultat ta’ draw jkun biżżejjed għalihom jekk il-partita bejn Newcastle u Milan tintemm bl-istess mod.
F’każ li l-Pariġini jispiċċaw fi draw u Newcastle jegħlbu lil Milan, ikunu l-Ingliżi li jikkwalifikaw minħabba li fil-konfronti diretti l-Magpies rebħu partita bl-oħra tintemm fi draw.
Jekk min-naħa l-oħra jirbħu Milan, jgħaddu PSG minħabba s-superjoritá tal- konfronti diretti.
PSG jistgħu jikkwalifikaw ukoll jekk jiġu megħluba u l-logħba bejn Newcastle u Milan tintemm fi draw.
Fi Grupp H, punt ikun biżżejjed għal Porto meta jilqgħu lil Shakhtar Donetsk li t-tnejn għandhom disa’ punti.
Dan minħabba li fl-ewwel partita, il-Portugiżi kienu ħarġu rebbieħa bl-iskor ta’ 3-1.
