Hamrun Spartans jilqgħu lil Alashkert tal-Armenja fit-tieni leg tal-ewwel round ta’ kwalifikazzjoni tal-UEFA Confernce League.
Huma jippruvaw idawru t-telfa ta’ 1-0 li sofrew ġimgħa ilu fir-Republican Stadium Vazgen Sargsyan, bl-uniku goal tal-logħba jasal, fl-24 minuta, permezz ta’ xutt fil-baxx ta’ Artak Yedigaryan wara pass tajjeb ta’ Bladimir Diaz.
Iżda minkejja din it-telfa, il-Ħamruniżi kellhom prestazzjoni tajba fejn kellhom ukoll il-mumenti tagħhom minn tentattivi perikolużi ta’ Elvis Mashike, Jonny u Fedele.
Fl-imsemmija logħba, il-coach Branko Nisevic ta d-debutt lil bosta players li jinkludu lil Ederson Bruno Domingos, Elvis Mashike, Ognjen Bjelicic, Jonny Robert do Nascimento Torres, Roko Prsa, Igor Nedeljkovic, u Ryan Camenzuli filwaqt li rritorna Matthew Guillaumier f’nofs il-ground.
Wieħed irid iqis li kienet l-ewwel partita għal dawn il-players flimkien fejn taw indikazzjoni li l-Ispartans se jkunu ferm qawwija fil-kampjonat domestiku.
U meta wieħed iqis li goal wieħed biss qed jifred lil dawn iż-żewġ timijiet, teżisti possibbiltá kbira li l-Maltin jaqtgħu l-passaġġ tagħhom għat-tieni round.
Il-coach, Branko Nisevic, għandu l-players kollha għad-dispożizzjoni u għaldaqstant mistenni jinżel għal dan il-konfront bl-aqwa formazzjoni possibbli.
Is-sigriet huwa li l-Ispartans iridu jiftħu l-iskor fl-ewwel 20 minuta biex ikunu jistgħu jiddettaw il-logħba filwaqt li jridu joqogħdu attenti mill-kontrattakki hekk kif l-Armeni għandhom wingers ħfief.
Alashkert huma mmexxija mill-coach, Aram Voskanyan, li f’kummenti li ta lill-media Armena qal li qed jistenna partita ferm diffiċli u għalhekk se jkun qed jilgħab bi pjan ta’ konteniment u jopera bil-kontrattakki konxju mill-fatt li Hamrun Spartans jippossjiedu attakk veloċi.
Barra minn hekk, huwa qed jittama li ż-żewġ wingers, Bladimir Diaz u Artak Yedigaryan, ikunu fil-forma solita tagħhom minħabba li huma kapaċi japprofittaw mill-iżbalji tal- avversarji.
Ir-rebbieħ ta’ dan il-konfront javvanza għat-tieni round fejn jilgħab kontra Velez Mostar ta’ Bosnja-Herzegovina.
Il-logħba se tintlagħab fis-Centenary Stadium u tibda fit-8.00 pm.
