Fl-ewwel round ta’ kwalifikazzjoni tal-UEFA Conference League, Floriana jilqgħu lil Petrocub- Hincesti tal-Moldova li hija meqjusa bħala partiti diffiċli.
Il-Greens ġejjin mis-suċċess tar-rebħ tal-FA Trophy wara finali missielta kontra r-rivali eterni Valletta. Fil-Kampjonat Premier huma temmew fit-tieni post tal-klassifika, tliet punti taħt iċ-champions Hibernians.
Il-Greens ikkonfermaw lill-coach Gianluca Atzori biex jiggwidahom għat-tieni sena konsekuttiva.
Barra minn hekk kisbu tliet players – il-goalkeeper żagħżugħ Duncan Formosa mingħand St Andrews, l-midfielder ċentrali Carlo Zammit Lonardelli mingħand Sirens u l-attakkant James Scicluna mingħand Pietá Hotspurs.
Il-coach Atzori huwa fiduċjuż għal dan l-ewwel impenn Ewropew tiegħu għalkemm jinsab konxju mill-qawwa tal-avversarji li huwa kompost minn għadd ta’ players żgħażagħ straordinarji.
Il-Greens ilhom għal dawn l- aħħar ġimgħat jitħarrġu biex jippreparaw għal dan il-konfront. Huma lagħbu wkoll żewġ partiti ta’ ħbiberija kontra Hibernians (1-0) u kontra Hamrun Spartans (3-1) li rebħuhom it-tnejn.
L-avversarji ta’ Floriana ġew imwaqqfa fl-1994 u li f’dawn l-aħħar ħames snin dejjem spiċċaw fit-tieni jew fit-tielet post tal-ogħla diviżjoni.
Sadanittant it-team qed jitħejja sew għall-bidu tal-kampjonat il-ġdid li se jibda fl-aħħar ta’ dan ix- xahar hekk kif jilagħbu f’darhom kontra Sfintul Gheorghe.
Huma ilhom jipparteċipaw fil- kompetizzjonijiet Ewropej għal dawn l-aħħar erba’ snin. Fl-ewwel tliet parteċipazzjonijiet huma dejjem ġew eliminati mill-ewwel round tal-UEFA Europa League
Fl-ewwel ċans tagħhom fil-UEFA Europa Conference League, huma eliminaw lil Sileks tal-Maċedonja għalkemm sfaw eliminati minn Sivasspor tat-Turkija fit-tieni round ta’ kwalifikazzjoni.
Il-coach tagħhom huwa Alexei Savinov, li għandu 43 sena, u fil-karriera tiegħu ta’ player kien jilgħab fil-pożizzjoni ta’ difensur ma’ bosta timijiet mill-Unjoni Sovjetika.
Dan se jkun it-tieni konfront bejn team Malti u ieħor mill-Moldova. Fl-2005/06, Sheriff Tiraspol eliminaw lil Sliema Wanderers mill-ewwel round tal-UEFA Europa League, b’aggregate ta’ 6-1 (4-1, 2-0).
Il-logħba se tintlagħab fis-Centenary Stadium u tibda fis-7.00 pm.
