Uffiċjal fi ħdan l-Orkestra Filarmonika ta’ Malta tpoġġa taħt ordni ta’ trażżin u ngħata sentenza sospiża wara li ammetta li ffastidja sesswalment mużiċista żagħżugħa fuq perjodu ta’ tliet snin.
Ir-raġel ta’ 31 sena, li huwa Għawdxi u ismu ma jistax jixxandar fuq ordni tal-Qorti kien akkużat li taha fastidju, li ssuġġettaha għal imġiba sesswali mhux mixtieqa u użu ħażin ta’ tagħmir tat-telekomunikazzjoni.
Kien allegat li r-raġel kien jibgħat lill-mara messaġġi ta’ natura sesswali u kien imissha b’mod xieraq filwaqt li jinjora t-talbiet tagħha biex jieqaf. L-allegat abbuż beda f’Mejju 2019 u baqa’ għaddej sax-xahar li għadda. Il-vittma kienet irriżenjat mill-Orkestra biex tevita kull kuntatt miegħu.
Qabel bdiet is-seduta, l-Avukat Giannella De Marco talbet lill-membri tal-pubbliku biex joħorġu ‘l barra mill-awla iżda l-Ispettur Gabriel Micallef oġġezzjona u sostna li l-każ ma kellux jinstema’ wara bibien magħluqa.
Il-Maġistrat Charmaine Galea ċaħdet it-talba u qalet li l-Qorti tista’, l-aktar, toħroġ divjet fuq isem l-akkużat kif ukoll dak tal-vittma. Dr De Marco qalet li l-akkużat “sofra ħafna minn ansjetà” li kkontribwiet għat-tmiem prematur tal-karriera mużikali tiegħu.
Wara li semgħet lill-imputat iwieġeb ħati tal-akkużi miġjuba kontra tiegħu, il-Qorti kkundannatu sena ħabs sospiżi għal erba’ snin. Ġiet imposta wkoll ordni ta’ trażżin favur il-vittma għal perjodu ta’ ħames snin.
Fl-aħħar tas-seduta, l-Avukat Difensur talbet lill-Maġistrat biex tissospendi s-sentenza, b’indikazzjoni li se tkun qiegħda tappella kontriha.
Il-Prosekuzzjoni tmexxiet mill-Ispetturi Gabriel Micallef u Kevin Pulis filwaqt li l-Avukati Giannella De Marco u Veronique Dalli dehru għall-imputat.
L-Avukati Ilenia Agius, Roberto Spiteri u Joseph Gatt dehru għall-vittma f’dawn il-proċeduri.
