Meta ntlagħbet l-aħħar ġurnata tal-UEFA Nations League, Spanja kkwalifikaw għas-semi-finali meta barra minn darhom għelbu lill-Portugall bl-iskor ta’ 1-0.
LEAGUE A – B’goal drammatiku skorjat fit-88 minuta minn Alvaro Morata, Spanja għelbu lill-Portugall 1-0 biex ingħaqdu mal-Olanda, il-Kroazja u l-Italja fis- semi-finali.
L-Isvizzera għelbu lir-Repubblika Ċeka bl-iskor ta’ 2-1 biex dawn tal-aħħar ġew relegati. Iż-żewġ goals tal-Isvizzeri waslu minn Remo Freuler (29) u Breel Embolo (30) filwaqt li Patrik Schick (45) wieġeb għaċ-Ċeki.
LEAGUE B – L-Albanija rebħu lill-Islanda bl-iskor ta’ 1-0 li wara biss 11-il minuta kellhom lil Aron Gunnarsson imkeċċi għal karta ħamra diretta. L-uniku goal ġie skorjat minn Ermir Lenjani (35).
L-Irlanda għelbu lill-Armenja 3-2 b’goals minn John Egan (18), Michael Obafemi (52) u Robbie Brady (90 pen) filwaqt li Artak Dashyan (71) u Eduard Spertsyan (73) wieġbu għat-telliefa.
Barra minn darhom, is- Serbia għelbu lin-Norveġja bl-iskor ta’ 2-0 b’goals minn Dusan Vlahovic (42) u Aleksandar Mitrovic (54).
F’partita bilanċjata, l-Isvezja u s-Slovenja temmew fi draw ta’ 1-1. Kien Benjamin Sesko (28) li fetaħ l-iskor għall-viżitaturi iżda Emil Forsberg (42) kiseb id-draw għall-Isvezja.
F’partita li ntlagħbet fil- Polonja minħabba l-gwerra f’pajjiżhom, l-Ukrajna u l- Iskozja temmew fi draw 0-0.
LEAGUE C – Il-Greċja rebħu lill-Irlanda ta’ Fuq bl-iskor ta’ 3-1. Dimitris Pelkas (14), Giorgios Masouras (55) u Petros Mantalos (80) kienu l-awturi tal-goals għall-Griegi filwaqt li Shayne Lavery (18) wieġeb għall-Irlandiżi.
Il-Kosovo rreġistraw rebħa kbira ta’ 5-1 fuq Ċipru bl-iskorers ikunu Florent Muslija (22), Donat Rrudhani (45), Elbasan Rashani (47) u Vedat Muriqi (52, 84) filwaqt li Valentin Roberge (81) irrisponda għal Ċipru.
