‘Irridu nikkonċentraw u nkunu kunfidenti fl-istil ta’ logħob tagħna minkejja t-titjib muri mit-timijiet li qed nilagħbu kontrihom’ qalet il-Kowċ tat-Tim Nazzjonali tan-Nisa Manuela Tesse qabel il-partita tal-UEFA Women’s Nations League li Malta se tilgħab kontra l-Moldova. Hija kompliet tgħid li ‘t-tfajliet għamlu rkupru tajjeb wara l-logħba diffiċli fil-Latvja.’
Malta għamlet l-aħħar sessjoni ta’ taħriġ fis-Centenary Stadium ilbieraħ, bi tħejjija għall-konfront tal-lejla kontra l-Moldova. Waqt li tkellmet dwar dan il-konfront, il-Kowċ Tesse qalet li ‘l-plejers iridu jkunu ta’ ispirazzjoni għall-plejers oħra li jittamaw li jilagħbu l-futbol fil-futur’. Saħqet li hi u t-tim qed jittamaw li l-partitarji Maltin ikunu t-12-il plejer fis-Centenary Stadium illejla.
Il-Kowċ Manuela Tesse kellha tagħmel żewġ bidliet mis-sejħa tal-ġimgħa li għaddiet hekk kif kemm Veronique Mifsud kif ukoll Maria Farrugia ġew esklużi minħabba injury li ġarrbu fil-jiem li għaddew. Dawn se jiġu sostitwiti minn Alishia Sultana, li ddeċidiet li terġa’ lura għad-dmirijiet tat-Tim Nazzjonali wara li ħabbret l-irtirar tagħha aktar kmieni din is-sena, u Mariah Cardona rispettivament. Għalhekk huma mistennija bidliet fil-formazzjoni tal-lum hekk kif Maria Farrugia kienet inkluża mal-ewwel 11 nhar il-Ġimgħa li għadda fil-Latvja.
Malta irnexxielha tassigura l-ewwel tliet punti tard fil-logħba b’gowl waħdieni ta’ Hailey Bugeja li nkurunat l-20 dehra tagħha għal Malta. Meta tkellmet dwar il-logħba tal-lum, Bugeja qalet li qed tittama għal prestazzjoni aħjar mit-tim u saħqet fuq il-fatt li l-plejers kollha jemmnu fil-kapaċitajiet tagħhom u esprimiet it-tama tagħha li din il-kampanja tkompli bl-aħjar mod possibbli.
Ir-rebħa tal-Ġimgħa li għadda żiedet l-antiċipazzjoni għal-logħba tal-lum kontra l-Moldova, bil-Kowċ Tesse tittama li tikkapitalizza minn dan il-bidu pożittiv ta’ din il-kampanja tal-UEFA Nations League.
Iż-żewġ nazzjonijiet iffaċċjaw lil xulxin l-aħħar fl-2022, b’Malta tirbaħ il-konfront 3-1. Il-Moldova kienu fuq in-naħa telliefa fl-ewwel logħba li ntlagħbet ukoll nhar il-Ġimgħa li għadda meta sfaw megħluba minn Andorra fil-logħba inawgurali tagħhom f’darhom. It-tim tal-Moldova wkoll jinsab f’luttu wara t-telfa traġika ta’ Violeta Mitul fil-bidu ta’ Settembru. Bħalissa l-Moldova hija kklassifikata fil-114-il post fil-klassifika tal-FIFA.
Malta v Moldova se tintlagħab illum fis-Centenary Stadium (kick-off fit-8.00pm). Il-biljetti jistgħu jinxtraw mis-sit elettroniku tal-Malta FA, jew mill-grawnd stess fil-ġurnata tal-partita.
