Attivisti minn diversi organizzazzjonijiet qegħdin jagħmlu azzjoni ta’ solidarjetà waqt il-logħba tar-rugby bejn Malta u l-Iżrael fl-istadium ta’ Raħal Ġdid. Il-ġimgħa l-oħra, dawn l-organizzazzjonjiet sejħu għat-tkeċċija tal-Iżrael mill-Unjoni tar-Rugby Ewropea, fejn semmew il-politiki tal-apartheid li ilhom fis-seħħ għal snin twal, l-okkupazzjoni illegali tal-Palestina, u l-ġenoċidju li għaddej f’Gaża bħalissa.
L-isport fih innifsu huwa politiku. Timijiet nazzjonali jirrappreżentaw l-Istat u mhux l-ewwel darba li ntużaw biex jinbena kapital kulturali u leġittimità. Dan kien rikonoxxut b’mod ċar meta r-Russja ġiet imkeċċija mill-entitajiet Ewropej sportivi kollha, inluż l-unjoni tar-Rugby, meta nvadiet lill-Ukrajna.
L-Iżrael iħobb jipprova jiġbor ġieħu permezz tal-isport – billi juża istituzzjonijiet kulturali, inkluż l-isport, biex jaħbi l-oppressjoni brutali tiegħu tal-poplu Palestinjan. L-isport huwa wieħed mill-oqsma fejn il-politiki tal-apartheid tal-Iżrael joħorġu fil-beraħ. Filwaqt li l-atleti Iżraeljani jistgħu jipparteċipaw f’avvenimenti internazzjonali mingħajr restrizzjonijiet, l-atleti Palestinjani fl-artijiet okkupati kontinwament jiġu miċħuda permessi biex jivjaġġaw, jintbagħtu l-ħabs, jindarbu, jew saħansitra jiġu maqtula.
L-aħħar vjaġġ internazzjonali mit-tim tar-rugby tal-Afrika t’Isfel taħt l-apartheid sar fl-1981. Minn dakinhar sakemm waqa’ r-reġim tal-apartheid, id-dinja bbojkottjat lit-tim tar-rugby tal-Afrika t’Isfel bi protesta kontra l-politiki razzisti u oppressivi tagħha, u għamlet sew.
L-Iżrael mhux biss ilu jħaddem sistema tal-apartheid kontra l-Palestinjani għal għexieren ta’ snin, imma bħalissa qiegħed iwettaq ġenoċidju sħiħ. Dan wassal għall-qerda sistematika tal-infrastruttura, tas-servizzi tas-saħħa u tal-edukazzjoni f’Gaża; għall-qtil bil-ġuħ tal-popolazzjoni; u għall-qtil ta’ iktar minn 50,000 Palestinjan, il-maġġoranza tagħhom nisa u tfal.
Ftit tal-jiem ilu biss, 15 il-paramediku u ħaddiema tas-salvataġġ ġewwa Gaża ġew maqtula mill-forzi Iżraeljani – billi sparawlhom għal rashom mill-qrib u difnuhom ġo qabar tal-massa.
Dawn ir-reati tal-biża’ setgħu iseħħu biss bil-kompliċità ta’ stati tal-Punent, li jibqgħu jappoġġjaw lill-Iżrael politikament, u saħansitra jfornuh finanzjarjament u militarment.
Huwa falliment morali profond li l-Iżrael tħalla jkeċċi lill-Palestinjani minn arthom għal iktar minn 76 sena, iħaddem reġim tal-apartheid għal għexieren ta’ snin, u issa qed jitħalla jikkommetti ġenoċidju quddiem id-dinja kollha.
L-unika azzjoni li moralment tista’ tiġi ġġustifikata bħalissa hija l-iżolament tal-istat ġenoċidali Iżraeljan – inkluż it-tkeċċija tiegħu mill-organizzazzjonijiet sportivi internazzjonali.
Għaqdiet:
Moviment Graffitti
Ġustizzja għall-Palestina
Watermelon Warriors
Lebanese Advocates
Youth for Palestine
