Minn Cristian Muscat
Balzan ……….1
Valletta ………1
Kien proprju fid-90 minuta li Valletta kisbu punt prezzjuż fi draw ġust ta’ 1-1 kontra Balzan, bil-partita tkun waħda ferm movimentata u entużjażmanti mill-bidu sat-tmiem. Permezz ta’ dan id-draw, Valletta aċċertaw ruħhom li staġun ieħor se jerġgħu jilagħbu mal-elite tal-football Malti fil-Kampjonat Premier.
Dan ir-riżultat xejn ma kkuntenta lil Balzan li baqgħu fiż-żona l-ħamra.
Ta’ nota huwa l-fatt li l-assistant coach, Alejandro Pantoja, mexxa lil Balzan minflok il-coach, Paul Zammit, li jidher li għandu xi differenxi mal-kumitat.
Kienu Valletta li ħarġu fuq l-offensiva u wara biss żewġ minuti, wara li rċieva minn corner mogħti minn Caio Prado, Kevin Tulimieri, kellu xutt devjat f’corner mill-goalkeeper Jake Galea.
Fil-11-il minuta, Balzan kienu kostretti li jagħmlu sostituzzjoni sfurzata meta weġġa’ l-istess Galea biex il-goalkeeper ta’ riserva, Rudy Briffa, daħal bejn il- lasti.
Fil-25 minuta, il-Lilywhites reġgħu ħolqu l-periklu meta minn kontrattakk veloċi Andrea Zammit għadda tajjeb lejn David Promise li iżda l-konklużjoni tiegħu spiċċat ftit barra.
Erba’ minuti wara, xutt ta’ Mario Fontanella mill-viċin ġie devjat mid-difiża ta’ Balzan qabel ġie salvat b’diffikultá minn Briffa.
Fit-33 minuta, Balzan wieġbu għall-ewwel darba permezz ta’ xutt minn Milos Zlatkovic minn tarf il-kaxxa li għadda jħakkek mal-wieqfa.
Eżatt mal-ftuħ tat-tieni taqsima, Uros Ljubomirac kellu xutt li ħareġ l-aħjar tal-goalkeeper Belti, Alessandro Guarnone.
Fil-75 minuta, Balzan fetħu l-iskor meta Marcus Grima pprovda l-assist lil UROS LJUBOMIRAC li b’xutt angulat fil-baxx tefa’ l-ballun wara Guarnone.
Sitt minuti wara, il-Balzanin kellhom ferħa bla temma meta Ljubomirac għadda tajjeb lejn Bojan Kaljevic li tefa’ ġewwa, iżda r-referee Stefan Pace kien pront u ħassar il-goal minħabba li ġġudika li Kaljevic kien f’pożizzjoni ta’ offside.
Iżda fid-90 minuta, kontra x-xejra tal-logħob, Valletta ġabu l-iskor indaqs meta MARIO FONTANELLA approfitta minn indeċiżjoni fid-difiża avversarja u wiċċ imb’wiċċ ma’ Rudy Briffa, ma żbaljax.
BALZAN: 12-Jake Galea, 3-Augustine Loof, 6-Marcus Grima, 7-Milan Duric, 8-Paul Fenech (Neil Frendo 86), 10-Nikola Gulan, 18-Uros Lubmirac, 19-Milos Zlatkovic, 23-Milos Mijic (86-Bojan Kaljevic 65), 77-Aleksa Andrejic, 88-Sean Cipriott – Coach: Alejandro Pantoja
VALLETTA: 26-Alessandro Guarnone, 4-Jean Borg (10-Shaun Dimech 49), 14-Christian Gauci, 17-Andrea Zammit (9-Haris Dilaver 79), 18-Enmy Manuel Pena Beltre, 19-Emmanuel David Promise Oluwatobi, 24-Rowen Muscat, 66-Eslit Sala, 77-Caio Prado, 89-Mario Fontanella, 92-Kevin Tulimieri (6-Sheldon Mackay 73) – Coach: Danilo Doncic
REFEREE: Stefan Pace
ASS. REFEREES: Duncan Sultana, Vasil Vasilev
RABA’ UFF: Trustin Farrugia Cann
SKORERS: U. Ljubomirac 75 (B), M. Fontanella 90 (V)
AMMONITI: A. Loof, B. Kaljevic (B)
