Gżira United baqgħu fl-ewwel post tal-VMFA Cisk Premier League wara li għelbu lil Żurrieq Wolves 7-4.
Kienet logħba fejn il-Gżirjani kkontrollaw mill-bidu sal-aħħar għalkemm iż-Żrieraq dejjem baqgħu jagħmlu l-almu tagħhom.
Ian Zammit u Justin Grioli skorjaw tliet gowls kull wieħed filwaqt li Jonathan Pearson żied ieħor għat-tim tiegħu.
Żurrieq kellhom lil Kevin Vella skorja doppjetta filwaqt li Brian Axisa u Bjorn Bondin niżżlu isimhom fuq il-ktieb tal-iskorers.
Floriana għadhom isegwu lill-Maroons b’punt hekk kif għelbu bi tbatija lil Rabat Veterans 6-5.
Kienet logħba inċerta sal-aħħar bir-Rabtin li taw l-aqwa tagħhom għalkemm fil-ġurnata ma kienx biżżejjed.
Christian Cassar kien l-istilla tal-ġurnata għall-Furjaniżi meta skorja tliet gowls b’Manolito Micallef, Glenn Bonello u Gilbert Scerri li żiedu aktar gowls għat-tim tagħhom.
L-aqwa skorer tal-kampjonat Adam Smeir u Gilbert Camilleri skorjaw doppjetta kull wieħed b’Andre Scicluna li baqa’ jżomm it-tama għar-Rabtin.
Hibernians kisbu t-tieni rebħa staġjonali wara li għelbu lil Birkirkara 7-5 f’partita oħra ferm interessanti.
Beppe Antignolo skorja hat-trick għall-Pawlisti filwaqt li Adrian Lanzon, Clayton Micallef, Steve Bonnici u Ilia Nazarov sabu wkoll ix-xibka.
Luke Satariano skorja doppjetta għall-Karkariżi b’Jean Pierre Mifsud Triganza, Ronnie Hartvig u Bojan Kaljevic jgħaqqdu l-ħames gowls għat-tim tagħhom.
MFPA ħadu rebħa walk-over fuq Żejtun Red Stars.
KLASSIFIKA – VMFA Cisk Premier League
Gżira United Veterans 34, Floriana 33, Birkirkara St Helen’s 24, MFPA 26, Rabat 17, Żurrieq Wolves 12, Hibernians 6, Żejtun Red Stars 0.
