Tikteb il-President Emeritus, Marie Louise Coleiro Preca
Ma ssirx tabib mil-lum għal għada.
Aktar u aktar ma ssirx speċjalista ddedikat malajr.
It-traġedja tal-ispeċjalista Victor Calvagna hija daqqa ta’ ħarta lill-professjoni medika.
Daqqa ta’ ħarta lit-tfal morda bil-kanċer.
Daqqa ta’ ħarta lil tant genituri.
Daqqa ta’ ħarta lill-filantropija.
Daqqa ta’ ħarta lill-volontarjat.
Daqqa ta’ ħarta lis-soċjetà Maltija… lil pajjiżna.
Dr Calvagna mhux sempliċiment persuna fil-professjoni medika li jgħin bil-ħiliet tiegħu u bil-kapaċità tal-mediċina iżda huwa professjonist tal-qalb. Iħaddan il-valur tal-ġenerożità u l-imħabba lejn għajru. Il-volontarjat għamlu parti integrali minn ħajtu b’risq tfal morda bil-kanċer.
Puttinu Cares twieled propju minn din l-imħabba bla qies li Dr Calvagna għandu.
Il-viżjoni tiegħu flimkien max-xogħol li jwettaq ma’ oħrajn, jagħtu wens u konfort lil mijiet kbar ta’ tfal, ġenituri u familji.
Għalih huwa importanti, li mhux biss li tingħata l-aqwa kura u l-aħjar ambjent possibbli f’Rainbow Ward, iżda li t-tfal u l-ġenituri jibqgħu jingħataw l-appoġġ meħtieġ anke barra minn xtutna.
Victor Calvagna huwa viżjonarju.
Kif qaluli l-istess ġenituri li żort kemm il-darba ġewwa l-appartamenti ta’ Puttinu Cares ġewwa Sutton fl-Ingilterra, l-appoġġ permezz ta’ akkommodazzjoni attrezzata u l-ambjent ta’ kommunità żgħira Maltija, huma ta’ serħan ta’ moħħ bla qies.
Fl-appartamenti ta’ Sutton kien hemm min kellu jgħix xhur kbar u snin, jistenna sakemm ilesti l-proċess tal-kura sħiħa. F’dan il-kuntest aktar u aktar joħroġ il-kobor tal-viżjoni u l-ħidma bla waqfien ta’ Victor Calvagna.
Victor Calvagna huwa magħruf sew f’Marsdon Hospital ġewwa l-Ingilterra. Il-Professjonisti u l-Ispeċjalisti li jieħdu ħsieb lit-tfal u Maltin ohra, semmewh diversi drabi miegħi. Konvinta li anke għal dawn in-nies it-traġedja tiegħu hija daqqa ta’ ħarta.
L-esperjenza personali tiegħi, fl-inkontri li kelli ma’ Dr Calvagna dejjem jimpressjonani bl-enerġija, bl-entużjażmu u bid-determinazzjoni tiegħu biex ikompli jagħti appoġġ sħiħ lit-tfal u l-ġenituri. Tant li llum Puttinu Cares daħal għal proġett kbir ieħor, dak li jipprovdi akkommodazzjoni qrib l-isptarijiet fil-qalba ta’ Londra fuq l-istess mudell ta’ l-appartamenti f’Sutton.
It-traġedja ta’ Victor Calvagna hija kbira wisq għalina. Ħidmietu tibqa’ dejjem twennisna! Ħidmietu ma tista’ tintesa qatt, kemm għal ħila tiegħu bħala tabib u bħala speċjalista tat-tfal bil-kanċer, iżda wkoll għal viżjoni tiegħu u għal ħidma filantropika u voluntarja tiegħu.
Konvinta li din il-qalb tajba juriha ma’ martu u ma’ uliedu. Konvinta li din it-traġedja għal familja tiegħu hija kbira wisq. Iżda rrid ngħidilhom li mhux biss biex f’dawn iċ-ċirkostanzi diffiċilissimi jagħmlu kuraġġ, u li aħna bħala poplu ninsabu magħhom, iżda fuq kollox, għandhom biex ikunu kburin b’dak kollu li qed jinkiseb b’ħidmet Dr Calvagna.
It-traġedja ta’ Victor Calvagna ħasditna lkoll. Iżda jiġri x’jiġri, l-impatt pożittiv tiegħu fuq is-soċjetà Maltija huwa legat li jkompli jitgawda minn ġenerazzjonijiet sħaħ.
