Waqt preżentazzjoni tal-isponsorship li saret fil-klabb ġewwa tas-Sliema, il-President tal-klabb tal-Exiles Andrew Paris ikkonferma li l-ex plejers internazzjonali Taljani Alessandro Velotto u Guillermo Molina se jkunu l-plejers barranin għas–sajf li ġej
Fil-preżenza tas-sur Jonathan Shaw, CEO ta’ Welbee’s Supermarkets u quddiem it-tim kollu u diriġenti tal-istess klabb, Paris spjega li kemm Velotto kif ukoll Molina qed jilagħbu fl-ogħla livelli tal-kampjonat Taljan Tas-Serje A mat-timijiet ta’ Pro Recco u Quinto rispettivament. Għal Velotto din se tkun l-ewwel esperjenza tiegħu fil-kampjonat Malti filwaqt illi Molina, li fil-passat ukoll lagħab għal numru ta’ snin mat-tim Nazzjonali Spanjol, se jkun qieghed jilgħhab fil-Kampjonat Malti għar-raba’ darba.
Waqt il-preżentazzjoni tal-għajnuna lill-klabb, is CEO ta’ Welbee’s Jonathan Shaw spjega li dan il-ftehim ta’ tlett snin bejn Welbee’s u Exiles tidħol bħala parti mill-viżjoni tal-kumpanija biex tkun ta’ sosten għal diversi entitajiet sportivi, u l-klabb tal-Exiles jidħlu bħala parti ta’ din il-viżjoni hekk kif il-klabb jikkompeti biex jibqa’ jilgħab fl-ogħla livelli possibbli filwaqt illi jżomm l-ambjent ta’ familja bħala klabb. Shaw semma li Welbees huwa wkoll wieħed mill-isponsors ewlenin għall-logħob tal-pajjiżi ż-żgħar li se jisiru f’Malta f’Mejju li ġej. Il-President tal-klabb Andrew Paris irringrazzja lil Welbee’s talli għażlu lil Exiles bhala s-sieħeb tal-kumpanija fl-isport akwatiku u spjega li din l-għajnuna se tgħin mhux ftit lill-klabb biex iġib żewġ plejers bħal Molina u Velotto li se jgħinu ukoll fit-taħriġ tat-timijiet iż-żgħar tal-klabb.
