Francesco Ruotolo, Taljan ta’ 21 sena li kien qiegħed iżur pajjiżna ġie kkundannat xahrejn ħabs sospiżi għal 3 snin wara li ammetta li seraq pormtmoni ta’ mara minn lukanda f’Tas-Sliema.
Hu ammetta quddiem il-Maġistrat Marse-Ann Farrugia li wettaq dan ir-reat fil-15 ta’ Awwissu li għadda mill-Windsor Hotel.
L-Ispettur Elton Buckingham qal li l-imputat tressaq il-Qorti wara li l-investigaturi raw kameras tas-sigurtà, u hu deher dieħel fil-kamra tal-lukanda fejn kien qed joqgħod bil-portmoni f’idu.
Kemm il-prosekuzzjoni u anke d-difiża qalu li ż-żagħżugħ wettaq dan ir-reat “frott il-blugħa taż-żgħożija” u li ddispjaċih ħafna għal dak li wettaq.
Fis-sentenza tagħha l-Maġistrat Marse-Ann Farrugia qalet li għalkemm il-portmoni kien fih biss €35 huwa qatt ma offra lill-vittma li jagħtihomlha lura.
Qalet ukoll li għalkemm dan mhux ammont kbir jibqa’ l-fatt li dan kien inkonvenjent għall-vittma għax trid terġa’ tagħmel il-karta tal-identità, il-karti tal-kreditu u ċ-ċwievet tad-dar li l-akkużat qal li ma jafx fejn rema.