Xjenza Malta, aġenzija pijuniera fir-riċerka xjentifika innovattiva u l-iżvilupp sostenibbli, se tkun l-ewwel aġenzija tal-gvern li se tipprovdi muturi elettriċi lill-impjegati tagħha għall-bżonnijiet tal-uffiċċju, fi sforz biex jitnaqqsu l-konġestjoni tat-traffiku u l-emissjonijiet tal-karbonju, f’konformità mal-viżjoni tal-gvern li jippromwovi alternattivi ekoloġiċi.
Bħala parti mill-impenn tagħha għas-sostenibbiltà, Xjenza Malta se tkun qed toffri dawn il-muturi elettriċi għall-użu ta’ kuljum mill-impjegati, filwaqt li tħeġġiġhom jagħżlu trasport nadif u effiċjenti fuq vetturi tradizzjonali sabiex jivvjaġġaw lejn l-uffiċċju u jaqdu l-bżonnijiet tal-uffiċċju.
“Ninsabu kburin li qed inkunu minn ta’ quddiem b’din l-inizjattiva ġdida li għandha l-għan li tnaqqas l-impronta ambjentali tagħna filwaqt li toffri wkoll lill-impjegati tagħna mod uniku u prattiku biex jinnavigaw il-post tax-xogħol,” qal Silvio Scerri, CEO fi Xjenza Malta.” Billi nipprovdu muturi elettriċi għall-bżonnijiet tal-uffiċċju, nittamaw li nnaqqsu l-konġestjoni tat-traffiku fiż-żona, innaqqsu l-emissjonijiet u nispiraw lil organizzazzjonijiet oħra jadottaw politiki ħodor simili.”
Filwaqt li kompliet issaħħaħ l-impenn tagħha għall-mobbiltà sostenibbli, Xjenza Malta installat ukoll stazzjonijiet tal-iċċarġjar tal-karozzi elettriċi fil-bini tagħha matul il-ħinijiet tal-uffiċċju. Din il-faċilità se tkun disponibbli għall-impjegati li jkunu għamlu t-tranżizzjoni lejn vetturi elettriċi, billi tipprovdilhom mezz affidabbli u konvenjenti ta’ ċċarġjar waqt li jkunu fuq il-post tax-xogħol.
“L-isforzi tagħna jmorru lil hinn minn sempliċiment muturi — irridu nappoġġaw lill-impjegati li diġà għamlu jew jinsabu fil-proċess li jaqilbu għal karozzi elettriċi. Bl-istazzjonijiet tal-iċċarġjar ġodda li għadhom kif ġew installati, għandna l-għan li nipprovdu esperjenza ta’ vvjaġġar bla xkiel u sostenibbli għal kulħadd,” żied Silvio Scerri.
Din l-inizjattiva tallinja mal-għanijiet ambjentali usa’ ta’ Malta, inkluża l-ispinta riċenti tal-gvern biex jitnaqqsu l-emissjonijiet tal-karbonju u jiġi promoss l-użu ta’ vetturi elettriċi. L-impenn ta’ Xjenza Malta huwa konformi mal-istrateġiji appoġġati mill-gvern, inkluż l-għoti ta’ opportunitajiet għaż-żgħażagħ biex iħaddnu għażliet ta’ trasport aktar ekoloġiċi bħal mopeds u roti elettriċi.
Bl-adozzjoni ta’ dawn il-prattiċi sostenibbli, Xjenza Malta qed tagħti eżempju għal aġenziji u organizzazzjonijiet oħra tal-gvern li għandhom isegwu, filwaqt li ssaħħaħ ir-rwol tagħha bħala mexxejja fil-promozzjoni tal-amministrazzjoni ambjentali u r-responsabbiltà soċjali korporattiva.
Xjenza Malta tmexxi t-triq tal-ivvjaġġar sostenibbli bil-forniment ta’ muturi elettriċi u stazzjonijiet tal-iċċarġjar
