X’se jiġri wara rapporti mill-KPKK?

Fil-jiem li għaddew il-Kummissjoni Permanenti Kontra l-Korruzzjoni (KPKK) ippreżentat rapporti dwar investigazzjonijiet li għamlet abbażi ta’ allegazzjonijiet li saru fil-konfront tal-eks-Prim Ministru u Mexxej Laburista Joseph Muscat, l-eks-Ministru u Deputat Laburista Michael Farrugia u l-Ministri Owen Bonnici u Julia Farrugia Portelli. Minn dak allegat fuqhom lill-KPKK ma rriżultalha xejn. Il-Kummissjoni Permanenti kontra l-Korruzzjoni hija ffurmata mill-Imħallef irtirat Dr Lawrence Quintano, mill-eks-Kummissarju tal-Pulizija John Rizzo u minn Dr Philip Magri.

Se neħodhom każ każ peress li kien hemm allegazzjoni fil-konfront tal-eks-Prim Ministru fimkien mal-eks-Ministru Michael Farrugia u kien hemm allegazzjoni fil-konfront tal-Ministri Owen Bonnici u Julia Farrugia Portelli.

Fir-rigward tal-allegazzjoni fil-konfront ta’ Dr Joseph Muscat kienet saret talba lill-KPKK minn Arnold Cassola biex tinvestiga l-għoti ta’ rigali, arloġġ u fliexken tal-inbid Petrus lil Dr Muscat mingħand Yorgen Fenech.

Fil-konklużjoni tagħha dwar din l-allegazzjoni l-KPKK qalet li “minn dak li semgħet ma jirriżultawx li ngħataw l-arloġġ jew l-inbid biex ikun hemm xi vantaġġ ekonomiku, anzi fil-każ tal-Imrieħel pjuttost setgħu ntilfu xi flus mill-konsorzju bil-bidla fil-policy.

“Lanqas ma kien hemm ir-reat ta’ ‘trading in influence’ għaliex ukoll dan ir-reat għandu l-elementi tiegħu u, kif hemm fl-Explanatory Report dwar il-Konvenzjoni tal-Kunsill Ewropew rigward il-korruzzjoni jkun jinħtieġ l-element tal-go-between. Minn dak li semgħet il-Kummissjoni dan l-element ma jirriżultax.

“Il-Kummissjoni hija wkoll sodisfatta bl-ispjegazzjoni dettaljata li ta l-Onorevoli Dr Michael Farrugia dwar il-proġett tat-towers tal-Imrieħel kif ukoll li l-laqgħa li kellu ma’ Yorgen Fenech ma kenitx dwar l-Imrieħel imma dwar Portomaso.”

Is-sabiħa hi li milli ħareġ fl-investigazzjoni jidher li l-arloġġ li ngħata bħala rigal ma kienx uniku. Bħalu kienu diġà ngħataw lil ħaddieħor mill-istess persuna. Isbaħ minn hekk irriżulta wkoll lill-KPKK li Dr Joseph Muscat kemm l-arloġġ kif ukoll il-fliexken tal-inbid għaddihom lill-Istat.

Ħaddieħor għamel hekk?

Fir-rigward tal-allegazzjonijiet li saru fil-konfront tal-Ministri Owen Bonnici u Julia Farrugia Portelli se nirriproduċi post li tellgħet fuq Facebook il-Ministru Farrugia Portelli.

Fil-post tagħha l-Ministru Farrugia Portelli qalet hekk: “L-onestà tirbaħ fuq il-ħmieġ. Dħalt fil-politika nadifa u rrid noħroġ nadifa. Nilqa’ b’sodisfazzjon ir-rapport miIl-Kummissjoni Permanenti Kontra l-Korruzzjoni li kkonfermat li ‘ma hemmx provi dwar xi att ta’ korruzzjoni mwettaq minn xi uffiċċjal pubbliku jew minn xi Ministru.’

“Dan b’rabta ma’ allegazzjonijiet li saru snin ilu fil-konfront tiegħi u tal-kollega Ministru Owen Bonnici fil-qadi ta’ dmirijietna meta konna responsabbli mill-programm tal-IIP. Fi kliem sempliċi dak li kien imbuttat tant mill-midja tal-PN u n-nies tal-establishment ma kien xejn għajr gideb bla bażi.

“Fix-xhieda tiegħi kont spjegajt kif dan kien attakk sistematiku fuq Malta. Ġurnalisti Franċiżi kienu talbuni intervista fuq suppost il-programm tal-IIP, ħallsu l-vjaġġ, nefqu eluf ta’ ewro biex niżżlu crew sħiħ Malta, meta f’intervista ta’ 16-il minuta mkien qatt ma staqsewni fuq dak li suppost ġew għalih f’pajjiżna. It-tajn li ntefa’ biex tinħoloq stampa ta’ ħbiberija bejni u bejn aġenta tal-IIP hu infondat, għax kif spjegajt taħt ġurament, l-unika konnessjoni kienet li jien u l-aġenta konna fl-istess vann tal-iskola meta kellna 10 snin.”

Post fuq dawn l-istess linji tellgħu wkoll fuq il-paġna tal-Facebook tiegħu l-Ministru Owen Bonnici.

Mela, wara t-tfigħ ta’ daqstant tajn, wara ħafna daqq ta’ tnabar u allegazzjonijiet waħda wara l-oħra biex issa ma rriżulta xejn, x’se jiġri? L-irġulija titlob li min għamel l-allegazzjonijiet għandu jagħmel mill-inqas apoloġija. Min mela ma nafx kemm paġni fil-ġurnali biex iżejjen, iħammeġ u joskura lill-persuni konċernati, għandu almenu jgħid x’kienu l-konklużjonijiet li waslet għalihom l-KPKK. Jew qed nippretendi żżejjed?

Imma jien nħoss li għandi mmur bogħod aktar minn hekk. Inħoss li għandi nitlob rendikont finanzjarju ta’ kemm swew lill-pajjiż l-investigazzjonijiet dwar dawn l-allegazzjonijiet infondati. Meta ngħid kemm swew finanzjarjament lill-pajjiż ifisser kemm swew lilek u lili mit-taxxi li nħallsu. Hekk sewwa allura?

Donnu li hemm interess qawwi biex dawn ir-rapporti ma jingħatawx ir-rappurtaġġ li jixirqilhom. Fejn huma dawk li għal kull ħaġa ta’ xejn iwerżqu dwar is-saltna tad-dritt? Dwar il-ġustizzja. Fejn inħbew?

Din il-gazzetta rrappurtat li meta l-KPKK iltaqgħet ma’ Arnold Cassola (dwar l-allegazzjoni fil-konfront ta’ Dr Joseph Muscat) biex tara x’informazzjoni kellu, huwa qal li kien qed joqgħod biss fuq dak li kien intqal fil-mezzi tax-xandir!

Jekk dan li rrappurtat ‘It-Torċa’ huwa korrett allura hemm ħafna x’jingħad u x’ikun mistoqsi. Per eżempju: liema kienu l-mezzi tax-xandir li qagħad fuqhom Arnold Cassola? Cassola ħass li għandu jivverifika jekk il-mezzi tax-xandir li kkunsidrahom bħala sors ta’ informazzjoni kienux korretti fir-rapporti tagħhom? Jew qabad tali rapporti u għamilhom tiegħu u l-aqwa li jagħmel ħoss għax ressaq talba għal investigazzjoni?

[email protected]