In-negozjant Yorgen Fenech, l-eks Supretendent tal-Pulizija Raymond Aquilina u n-Nutar Mario Bugeja tressqu l-Qorti mixlija b’ħasil ta’ flus.
Aquilina kien imexxi t-taqsima tal-Korp tal-Pulizija li kienet tinvestiga l-ħasil tal-flus.
Fenech kien mixli b’korruzzjoni ta’ uffiċjal pubbliku u ħasil ta’ flus; Aquilina ġie akkużat b’korruzzjoni, ħasil ta’ flus u li ħalef falz waqt li n-Nutar Bugeja kien mixli b’ħasil ta’ flus.
Ġie rrapportat kif l-allegat akkużi huma relatati mal-bejgħ ta’ appartament f’Birżebbuġa lil Aquilina. Mhux magħruf jekk il-bejgħ sarx. It-tliet akkużati qed iwieġbu mhux ħatja għall-akkużi miġjubin kontrihom.
Il-Prosekuzzjoni qed titmexxa mill-Avukati Andrea Zammit u Gary Cauchi mill-Uffiċċju tal-Avukat Ġenerali flimkien mal-Ispettur Sean Friggieri.
L-Avukat Charles Mercieca qed jidher għal Fenech, l-Avukat Lennox Vella għal Aquilina u l-Avukati Franco Debono u Andreana Zammit qed jassistu lin-Nutar Bugeja.
