Zach Muscat irritorna fil-futbol Portugiż wara li ffirma kuntratt ta’ sentejn mat-tim tat-tieni diviżjoni G.D. Chaves.
Għall-internazzjonali Malti, Chaves se jkun it-tielet klabb tiegħu fil-Portugall, wara li qabel lagħab ma’ Farense u Casa Pia.
Muscat diġà ngħaqad mat-tim il-ġdid tiegħu fil-Portugall, fejn ħa sehem fit-taħriġ tal-pre-season qabel l-istaġun 2025/2026.
Huwa se jkun immexxi minn Filipe Martins, figura familjari għal Muscat, wara li ħadem miegħu ma’ Casa Pia mat-tim li kiseb il-promozzjoni għall-ogħla diviżjoni tal-Portugall fl-istaġun 2021/2022.
G.D. Chaves spiċċaw fis-seba’ post fil-Liga Portugal 2 fl-2024/2025 u ġie relegat mill-Primeira Liga fl-istaġun 2023/2024. Il-klabb rebaħ it-titlu tat-tieni diviżjoni darbtejn, l-aktar riċenti fl-istaġun 2012/2013.
Muscat iġib miegħu esperjenza sinifikanti fl-iskwadra, b’76 dehra fit-tieni diviżjoni tal-Portugall u 22 fl-ogħla diviżjoni. Ma’ Casa Pia, għamel 61 dehra, filwaqt li ma’ Farense lagħab 51 darba fil-kompetizzjonijiet kollha.
L-istaġun li għadda, Muscat qatta’ l-ewwel parti tal-istaġun mingħajr klabb qabel ma ngħaqad ma’ Şanlıurfaspor fit-tieni diviżjoni tat-Turkija matul it-tieqa tat-trasferimenti ta’ Jannar, fejn lagħab 15-il partita.
F’Ġunju, Muscat lagħab għal Malta fi draw ta’ 0-0 kontra l-Litwanja, u għen lit-tim nazzjonali jikseb l-ewwel punt tiegħu fil-kwalifikazzjonijiet tat-Tazza tad-Dinja tal-FIFA 2026.