Żewġ żeffiena sofrew ġrieħi waqt kunċert mużikali ġewwa Hong Kong hekk kif screen kbir waqa’ fuq il-palk hekk kif kien għaddej l-ispettakklu tal-band Mirror.
Dan il-kunċert ġie mwaqqaf immedjatament u l-maniġer tal-band talab lill-pubbliku biex joħroġ mill-arena bil-kalma.
Min-naħa tagħhom, il-pulizija ta’ Hong Kong ikkonfermaw ir-rapporti tal-midja li żewġ żeffiena, it-tnejn irġiel, iddaħħlu l-isptar għall-kura. Sorsi li tkellmu mal-midja qalu li wieħed miż-żeffiena sofra ksur f’għonqu u jinsab f’kundizzjoni serja fit-taqsima tal-kura intervisa filwaqt li ż-żeffien l-ieħor jinsab stabbli. Apparti hekk, għadd ta’ spettaturi ta’ dan il-kunċert kellhom jingħataw kura minħabba l-qatgħa li ħadu.
Il-grupp Mirror – li huwa boy band – huwa popolari ħafna ġewwa Hong Kong u huwa meqjus bħala dak il-grupp li reġa’ ta l-ħajja lill-Cantopop li hija mużika pop tipika ta’ Hong Kong.
