Is-sidien taż-żwiemel finalisti li qed jipparteċipaw fl-edizzjoni tal-2023 tal-BOV Tazza l-Kbira aktar kmieni llum tellgħu n-numri li se jiddeterminaw il-pożizzjoni tat-tluq taż-żiemel tagħhom fil-finali tal-aktar unur prestiġjuż fil-kalendarju lokali tat-tiġrijiet tat-trott.
Dan seħħ waqt konferenza stampa msejħa għall-okkażjoni li kienet indirizzata mill-Kap tas-CSR Dept fi ħdan il-Bank of Valletta, Charles Azzopardi, il-viċi Chairman tal-Malta Racing Club Anthony Demanuele u l-Kap Eżekuttiv tal-Malta Equidrome Matthew Brincat.
Kemm is-Sur Demanuele kif ukoll Dr Brincat faħħru u rringrazzjaw lill-Bank of Valletta talli għal darb’oħra reġgħu ssieħbu mat-tiġrijiet taż-żwiemel lokali permezz tal-appoġġ tagħhom għall-BOV Tazza l-Kbira. Huwa xieraq li trofew daqshekk importanti u prestiġjuż ikollu l-appoġġ ta’ organizzazzjoni bħall-Bank of Valletta. It-tnejn li huma awguraw ukoll tiġrija mill-aqwa lill-parteċipanti kollha u enfasizzaw li s-sigurtà trid tiġi l-ewwel u qabel kollox anke jekk xi drabi l-eċċitament tal-mument ikun diffiċli tikkontrollah.
‘It-tiġrijiet taż-żwiemel f’Malta jgawdu minn segwaċi ġenwini u appassjonati u jiffurmaw parti integrali mill-wirt kulturali għani ta’ Malta’, qal Charles Azzopardi. ‘Nieħdu din l-opportunità biex nawguraw l-aqwa prestazzjoni lill-finalisti kollha u nħarsu ‘l quddiem għal spettaklu sportiv ieħor bħala organizzazzjoni li tappoġġja inizjattivi sportivi ewlenin f’Malta f’konformità mal-impenn tal-Bank of Valletta lejn il-komunità li jopera fiha’.
Il-finali tal-BOV Tazza l-Kbira se ssir waqt il-laqgħa ta’ tiġrijiet tas-16 t’April u qed nistennew ġurnata ta’ divertiment għall-familja kollha li apparti l-ispettaklu tat-tiġrijiet taż-żwiemel se tinkludi show tal-muturi Harley Davidson kif ukoll wirja ta’ karozzi klassiċi Mercedes Benz.
Il-kompetizzjoni tinġera fuq id-distanza ta’ 2640m u l-aqwa ħin medju li wieħed ġħandu jegħleb huwa dak irreġistrat is-sena l-oħra minn Charming Soldier – 1’13”5 li huwa wkoll ir-rekord nazzjonali fuq din id-distanza. Interessanti li Charming Soldier se jkun qiegħed fost il-finalisti sabiex jiddefendi t-titlu. Miegħu hemm ukoll tlett iżwiemel oħra li kienu fil-finali 2022 – Doudou de Bouere li kien spiċċa fit-tielet post kif ukoll Dunbar u Infinite Knight.
Qabel it-tiġrija ikun hemm il-parata taż-żwiemel finalisti li fiha se jkunu mgħottija b’għotjien tal-okkażżjoni li flimkien man-numri personalizzati jibqgħu ta’ tifkira għas-sidien. Din il-parata se titmexxa miż-żiemel rebbieħ fis-sena 2021 Antoine du Bourg.
Filwaqt li s-sid tar-rebbieħ jiġi ppreżentat bil-BOV Tazza l-Kbira, huwa se jingħata wkoll trofew sabiħ maħdum bl-idejn u għata kommemorattiva għaż-żiemel. Jingħataw ukoll trofej lil dawk li jispiċċaw fit-tieni, tielet, raba’ u ħames post. Hekk kif jixraq l-aqwa kompetizzjoni tas-sena, t-total ta’ premjijiet fil-finali se jammonta għal €8250.
Dawn huma l-finalisti u s-sewwieqa tagħhom bin-numri li bihom se jibdew il-finali:
- DOUDOU DE BOUERE (Jean Claude Pace)
- AROS LINE (Marvic Bugeja)
- CHARMING SOLDIER (Paul Galea)
- LIAM DANA (Charles Camilleri)
- LUCKY GUY BOKO (Ludvic Ghigo)
- SIR Q.C. (Julian Farrugia)
- RALLY HANS (Marco Refalo)
- CRACK MONEY (Michael Ellul)
- DUNBAR (Redent Magro)
- INFINITE KNIGHT (Charles Degiorgio)
- DZAROF DE GUEZ (Claudio Refalo)
