Xejn inqas minn 35 ħaddiem tad-Diviżjoni għat-Tindif u l-Manutenzjoni kienu impenjati f’ħidma biex inaddfu l-iskart li tħalla minn dawk li attendew għall-kunċert tal-Isle of MTV.
It-tindif sar fil-ħin ta’ bejn nofsillejl u s-6.00 a.m, u b’kollox jirriżulta li nġabru mat-18-il tunnellata ta’ skart. Dan kien jinkludi wkoll il-ħasil tat-toroq kollha madwar l-avveniment.
Id-Direttur Ġenerali tad-Diviżjoni għat-Tindif u l-Manutenzjoni Ramon Deguara spjega li sar tindif mill-inħawi ta’ Bieb il-Bombi sal-Fosos tal-Floriana fejn sar l-avveniment, fit-toroq kollha tal-Floriana u anke mill-Fosos sal-Belt Valletta, inkluż Pjazza Tritoni.
Huwa rringrazzja lill-ħaddiema tad-Diviżjoni talli fi ftit sigħat rnexxielhom iġibu ż-żona tal-Floriana u l-Belt lura għan-normal mill-ammont kbir ta’ skart li kien iġġenerat wara l-kunċert.
Għall-Isle of MTV tat-Tlieta attendew eluf ta’ nies. Fl-edizzjoni ta’ din is-sena ħadu sehem Baby No Money, Mae Muller, Shaun Farrugia, DJ Marshmello u French Montana.
