L-awtoritajiet tal-Afrika t’Isfel qed jinvestigaw il-mewt ta’ mill-inqas 22 żagħżugħ u żagħżugħa f’diskoteka. Hu mifhum li l-iżgħar vittma kellu biss 13-il sena.
Il-vittmi nstabu mixħutin mal-art u fuq l-imwejjed fid-diskoteka Enyobeni Tavern li tinsab fil-belt kostali ta’ East London. Il-katavri ttieħdu kollha fil-kamra mortwarja fejn hemm se jiġu analizzati u jsirulhom għadd ta’ testijiet – anke tossikoloġiċi – biex tkun magħrufa l-kawża tal-mewt.
Il-President tal-Afrika t’Isfel Cyril Ramaphosa esprima d-diqa tiegħu u ta l-kondoljanzi lill-qraba tal-vittmi. S’issa għadu mhux magħruf x’wassal għal din it-traġedja u l-awtoritajiet ma pprovew l-ebda dettalji. Is-Sindku tal-proviċinja East Cape kellu biss kliem ta’ kundanna “għall-ikkonsmar bla limitu ta’ alkoħol”.
Investigaturi foresiċi li tkellmu ma’ midja internazzjonali ċaħdu li dak li seħħ kien ikkawżat minn diżastru tal-folla hekk kif il-katavri ma kellhom l-ebda ġrieħi viżibbli. Jidher li l-investigaturi qegħdin jinvestigaw bir-reqqa biex jaraw jekk dan kienx xi każ ta’ vvelenar.