9:00a.m.: Il-mara li tilfet ħajjitha lbieraħ ġiet identifikata bħala Tuneżina ta’ 30 sena.
Mill-ewwel stħarriġ irriżulta li hija ntlaqtet minn Mercedes Benz C350 misjuqa minn raġel ta’ 42 sena residenti l-Mellieħa. Il-Mercedes imbagħad ħabtet f’erba’ vetturi li kienu pparkjati.
Fuq il-post issejjaħ tim mediku u membri mid-Dipartiment tal-Protezzjoni Ċivili biex jassistu iżda sfortunatament il-mara kienet iċċertifikata mejta fuq il-post.
Raġel Tuneżin li kien mal-vittma kif ukoll ix-xufier tal-Mercedes ittieħdu permezz t’ambulanza l-Isptar Mater Dei sabiex jingħataw l-kura meħtieġa. Aktar tard, huma ġew iċċertifikati bi ġrieħi ħfief.
Bil-każ ġiet infurmata l-Maġistrat tal-Għassa Dr Lara Lanfranco LL.D, li ordnat li ssir inkjesta u ħatret diversi esperti sabiex jassistu.
9:30 p.m: Dan is-sit jista’ jikkonferma li sfortunatament f’dan l-inċident tilfet ħajjitha mara li l-identità tagħħa għadha mhijiex magħrufa wara li ttajret minn vettura.
Fil-post ssejħet ambulanza u tim mediku li assista lis-sewwieq tal-vettura involuta fl-inċident sakemm dan seta’ jittieħed lejn l-isptar Mater Dei għall-kura neċċesarja.
Kawża ta’ dan l-istess inċident hemm xi vetturi oħra li sofrew ħsarat waqt li kienu pparkjati.
8:45 p.m: Dan is-sit jinsab infurmat li triq it-Telgħa tax-Xemxija hija magħluqa għat-traffiku wara li għall-ħabta tat-8:00 p.m seħħ inċident tat-traffiku.
F’dan l-istadju mhuwiex magħruf in-numru ta’ persuni involuti f’dan l-inċident, għalkemm skont l-ewwel rapporti jidher li hemm minn tal-inqas persuna li sofriet ġrieħi serji f’dan l-inċident.
Is-sewwieqa huma mħeġġa jevitaw iż-żona.
Aktar dettalji kif jaslulna…
