L-attakkant ta’ Fulham, Alexandar Mitrovic, jista’ jiffaċċja sospensjoni għall-kumplament tal-istaġun wara li tkeċċa fit-telfa ta’ 3-1 kontra Manchester United li ntlagħbet f’Old Trafford, valida mill-kwarti-finali tal-FA Cup
Kienu Fulham li fetħu l-iskor mill-istess Mitrovic fejn dehru li kienu se joħolqu sorpriża kbira iżda l-affarijiet inbidlu drastikament fit-72 minuta.
Dan wara li Willian mess il-ballun b’idu mit-tentattiv ta’ Jadon Sancho biex tellef azzjoni ta’ goal u għaldaqstant ir-Red Devils ingħataw penalty filwaqt li Willian intwera l-karta l-ħamra.
Waqt li r-referee, Chris Kavanagh mar jikkonsulta l-VAR, huwa keċċa wkoll lill-coach tal-Cottagers, Marco Silva minħabba protesti eċċessivi.
Wara li l-uffiċjal tal-logħba pponta lejn il-penalty spot u kkonferma t-tkeċċija ta’ Willian, kien imiss lil Mitrovic li jitlef il-kalma u jipprotesta bil-qawwa kollha.
Huwa ntwera l-karta l-ħamra minħabba li għamel kuntatt fiżiku darbtejn mar-referee.
Nhar it-Tnejn, l-FA Ingliża ħarġet akkuża kontra l-player Serb filwaqt li tat indikazzjoni li se jirċievi sospensjoni fit-tul.
L-istqarrija kienet tgħid: “L-imġieba ta’ Aleksandar Mitrovic lejn l-uffiċjal tal-logħba kienet waħda inaċċettabbli.
“Barra minn hekk, l-imġieba u/jew il-lingwaġġ ta’ Mitrovic kienu allegatament mhux xierqa u/jew abbużivi u/jew insulti u/jew theddid wara t-tkeċċija tiegħu.”
Fulham mistennija jappellaw l-eżitu tas-sentenza u se jressqu l-inċident li seħħ aktar kmieni dan ix-xahar fejn il-midfielder ta’ Manchester United, Bruno Fernandes, deher jimbotta bi protesta lill-assistant referee fit-telfa ta’ 7-0 kontra Liverpool.
Iżda l-FA Ingliża naqset li tieħu xi forma ta’ azzjoni.
