Konservazzjonisti qed jitolbu għal investigazzjoni immedjata wara li ammont kbir ta’ ħut instab mejjet fix-xmara li tgħaddi bejn il-Ġermanja u l-Polonja u eventwalment tiżbokka fil-Baħar Baltiku.
Ix-Xmara Oder tibda mir-Repubblika Ċeka u tibqa’ għaddejja għal 742 kilometru bejn il-fruntieri tal-Polonja u l-Ġermanja. Din hija meqjusa bħala parti mill-Polonja u hija t-tieni l-itwal xmara li hemm f’dan il-pajjiż.
Fid-dawl ta’ dak li nstab, voluntiera mill-Ġermanja u mill-Polonja bdew operazzjoni ta’ tindif. Piotr Niezananski – li huwa direttru ta’ WWF ġewwa l-Polonja – qal li jidher li f’din ix-xmara ntefgħet xi kimika industrijali. Ġara li minħabba n-nixfa li hemm bħalissa fl-Ewropa, il-livell tal-ilma f’din ix-xmara naqas u b’hekk il-kimika ġiet iktar ikkonċentrata.
Fid-dawl ta’ dan, Nieznanski ħeġġeġ lill-awtoritajiet governattivi biex jinvestigaw dan il-każ u talab biex kull informazzjoni tiġi ppubblikata. L-awtoritajiet Pollakki wissew liċ-ċittadini biex ma jgħumux u lanqas imissu l-ilma ta’ din ix-xmara.
S’issa s-sors tat-tniġġis li wassal għal dan id-diżastru naturali għadu mhux magħruf.
