Ftit li xejn kien baqa’ minn daru wara li ġiet kważi meqruda minn trombi devastanti li ħakmu fl-aħħar jiem ġewwa Kentucky. Id-dar ta’ Jordan Baize, raġel ta’ 34 sena, saħansitra spiċċat bla saqaf u ma baqgħetx abitabbli. Iżda qalb it-tifrik baqa’ l-pjanu tant maħbub tiegħu li f’dak il-mument, xi ftit jew wisq ta’ qtigħ ta’ qalb, offrielu ftit wens.
Minkejja xi noti neqsin, Jordan ma ħasibix darbtejn biex, wara li ħareġ mill-kantina fejn kien jinsab jistkenn minħabba l-maltemp, poġġa bilqiegħda quddiem l-pjanu u beda jdoqq il-kanzunetta ta’ qima favorita tiegħu, “There’s something About That Name” ta’ Bill u Gloria Gaither.
Meta rat dak li kien qed jiġri quddiem għajnejha, oħtu Whitney Brown, minnufih bdiet tieħu vidjow fejn aktar tard ippubblikatu fuq il-midja soċjali. Fi żmien qasir il-filmat sar popolari fejn bosta kienu dawk li ħallew xi kumment u saħansitra ġie xxerjat aktar minn 500,000 darba.
Tassew hija storja li tgħallimna li qalb it-tifrik, jaf xorta waħda insibu xi ħaġa li b’xi mod jew ieħor niksbu ftit wens.
Sfortunatament fl-isfond ta’ din l-istorja hemm l-istorja traġika hekk kif mill-inqas 88 persuna nqatlu kawża tat-trombi devastanti li laqtu lil għadd ta’ bliet ġewwa Kentucky.
Għadd ta’ nies fl-istat tilfu l-maħbubin, id-djar u l-affarijiet tagħhom. Xi ġenituri saħansitra tilfu lil uliedhom. Fost il-mejta hemm 12-il tifel, fosthom tifel ta’ xahrejn u ta’ ħames xhur.
