L-attur Arnold Schwarzenegger kien involut f’inċident ikrah bil-karozza ġewwa Los Angeles.
Il-ħabta bejn erba’ vetturi, li seħħet il-Ġimgħa wara nofsinhar, ħalliet persuna waħda bi ġrieħi, qalet il-Pulizija ta’ Los Angeles.
Ritratti li ttieħdu mill-post tal-inċident juru li l-karozza tiegħu telgħet fuq mill-inqas żewġ vetturi filwaqt li l-attur jidher wieqaf fil-qrib.
Il-Pulizija qalet li ma sar l-ebda arrest u eskludiet l-involviment ta’ droga u alkoħol.
Skont dak li ġie rrappurtat, huwa kien qed idur fit-triq traffikuża meta l-karozza tiegħu ħabtet ma’ Prius u l-GMC Yukon SUV tiegħu spiċċat fuq il-karozza l-oħra.
Il-karozza tiegħu mbagħad tgerbet lejn Porsche li kienet tinsab wara l-vettura tiegħu, b’persuna li rat dan kollu jseħħ tiddeskrivih bħallikieku kienet stunt ta’ film.
Kawża ta’ dan l-inċident ix-xufiera tal-Prius ittieħdet l-isptar għall-kura minħabba xi ġrieħi li kellha f’rasha.
Il-kelliem ta’ Schwarzenegger qal li l-attur ma weġġax f’dan l-inċident tant li baqa’ fuq il-post u kien ukoll tkellem mal-pulizija u mal-persuna feruta.
Rapporti qalu li bħalissa għaddejjin l-investigazzjonijiet b’rabta ma’ dan l-inċident.
