Ritratt: Facebook
Arsenal qed iżommu ħarsithom mill-qrib fuq l-istilla ta’ Red Bull Salzburg, Roko Simic.
Iż-żagħżugħ ta’ 18-il sena ġie misluf lit-team ta’ riserva ta’ Salzburg FC Liefering għall-istaġun 2021-22 u diġà skorja seba’ goals minn 10 dehriet fit-tieni diviżjoni Awstrijakka dan l-istaġun.
Simic ħareġ ukoll minn fuq il-bank għall-aħħar tliet minuti tar-rebħa fiċ-Champions League li Salzburg kisbu fuq Wolfsburg il-ġimgħa li għaddiet – li mmarka d-debutt tiegħu mat-team tal-kbar ta’ Salzburg – u l-iżvilupp mgħaġġel tiegħu ma damx biex ġie nnutat.
Arsenal huma kontendenti ewlenin biex jilħqu ftehim għal Simic, li skorja wkoll ħames goals minn erba’ dehriet għat-team nazzjonali tal-Kroazja ta’ taħt il-21 sena.
Madankollu, Tottenham Hotspur ġew ikkreditati wkoll b’interess fl-attakkant li għandu valur ta’ £7 miljun, li huwa iben l-ex difensur tal-Kroazja u ta’ AC Milan, Dario Simic.
Simic qabel lagħab ma’ Lokomotiva Zagreb qabel ma ngħaqad ma’ Salzburg dan is-sajf, u l-kuntratt tiegħu mal-ġganti Awstrijaċi jiskadi fl-2025.
