Il-President tal-World Athletics, Sebastian Coe, qal li l-pożizzjoni tal-organizzazzjoni dwar is-sanzjonijiet kontra l-atleti Russi u Belarussi mhux se tinbidel.
Dawn l-atleti ilhom sospiżi milli jikkompetu f’kompetizzjonijiet internazzjonali tal-atletika mill-invażjoni Russa tal-Ukrajna fl-2022.
Il-Federazzjoni Russa tal-Atletika ressqet każ ġdid quddiem il-Qorti tal-Arbitraġġ għall-Isport (CAS) biex tikkontesta s-sanzjonijiet. Madankollu, Coe insista li d-deċiżjoni tal-World Athletics mhijiex kwistjoni ta’ politika jew passaporti, iżda waħda marbuta mal-integrità tal-kompetizzjoni.
Coe, li rebaħ żewġ medalji tad-deheb Olimpiċi, qal li se jattendi personalment is-seduta tal-CAS biex jippreżenta l-każ favur il-World Athletics. Huwa saħaq li l-kwistjoni għandha tissolva u li l-għan aħħari għandu jkun li l-atleti kollha jkunu jistgħu jikkompetu fuq livell globali.
Il-Federazzjoni Russa kkritikat l-intenzjoni ta’ Coe li jattendi s-seduta, u sostniet li l-pożizzjoni tiegħu hija personali.
Il-pożizzjoni tal-World Athletics tvarja minn dik tal-Kumitat Olimpiku Internazzjonali (IOC) u federazzjonijiet sportivi oħra.
Il-Kumitat Olimpiku Internazzjonali neħħa proviżorjament is-sospensjoni tar-Russja, filwaqt li federazzjonijiet bħall-ġinnastika, l-għawm u l-boxing neħħew restrizzjonijiet fuq atleti Russi.
Atleti Russi u Belarussi diġà kkompetew bħala newtrali fil-Logħob Olimpiku ta’ Pariġi 2024 u fl-Olimpjadi tax-Xitwa ta’ Milan.
