L-aqwa seed Novak Djokovic se jmexxi l-Grupp Aħdar fl-ATP Finals li se jibdew illum fil-Pala Alpitour ta’ Turin li jinkludi wkoll lill-favorit domestiku u seed numru 4, Jannik Sinner, Stefanos Tsitsipas (6) u Holger Rune (8), ġie żvelat fit-tlugħ tal-poloz li saru nhar il-Ħamis.
It-tieni seed Carlos Alcaraz se jmexxi l-Grupp Aħmar, li se jkun fih ukoll lil Daniil Medvedev (3), Andrey Rublev (5) u Alexander Zverev (7).
Djokovic, sitt darbiet champion tal-finali tal-istaġun, qed jipprova jikser ir-rekord li qed jaqsam ma’ Roger Federer għall-biċċa l-kbira tat-titli fl-istorja tal-kampjonat. Huwa qed jagħlaq ukoll biex jispiċċa fil-quċċata tar-rankings għat-tmien darba fi tmiem l-istaġun.
F’dawk li huma premjijiet finanzjarji t-tournament għandu total ta’ $15-il miljun għat-tmien tennisti li okkupaw l-ewwel tmien postijiet tar-rankings tad-dinja bis-somma tissupera l-qliegħ ta’ kwalunkwe tournament tal-Grand Slam.
Għalhekk, l-inċentivi finanzjarji huma sostanzjali, b’ammont fiss ta’ $325,500 garantit biex sempliċement jikkwalifikaw għall-avveniment.
Imbagħad, darba fl-Italja, kull rebħa fil-fażi tal-gruppi tikkontribwixxi $390,000 aktar għall-qliegħ ta’ player.
L-avvanz għall-istadju finali tal-kompetizzjoni jiġi bi premju konsiderevoli ta’ €1,105,000 u r-rebħ tat-titlu jġib il-premju sostanzjali ta’ $2,201,000.
Notevolment, jekk player jikseb rekord mhux megħlub matul il-kampjonat, kif kien il-każ minn Novak Djokovic is-sena l-oħra, is-somma monetarja teskala għal €4,801,500 bla preċedent, li tistabbilixxi punt ta’ referenza storiku fl-isports tar-rakketta.
Ħarsa lejn kif jinqasmu l-premjijiet:
• Miżata ta’ parteċipazzjoni fissa: $325,500
• Rebħa fil-gruppi: $390,000
• Rebħa fis-semi-finali: $1,105,000
• Champion: $2,201,000
L-ewwel logħba se tibda fis-2.30 pm u tkun bejn Sinner u Tsitsipas waqt li fid-9.00 pm jidħol fl-azzjoni Djokovic li jiltaqa’ kontra Rune.
