Balzan ……..3
Mosta ………2
Minn Cristian Muscat
Wara żewġ telfiet konsekuttivi, Balzan ħasdu lil Mosta meta għelbuhom bl-iskor ta’ 3-2, bil-goal tar-rebħa jasal proprju fl-aħħar ħames minuti.
Mosta fetħu l-iskor fl-14-il minuta, meta minn azzjoni ta’ corner, il-ballun spiċċa f’saqajn GIANCARLO GONCALVES li b’xutt sabiħ minn barra l-kaxxa spara ġewwa.
Huma komplew jiddettaw il-logħob u ħames minuti wara, Kone avvanza tajjeb fil-kaxxa izda kellu x-xutt fil-baxx tiegħu jintemm barra.
Iżda Bazlan wettqu reazzjoni tajba u fil-25 minuta, għamlu l-iskor indaqs meta l-player tal-logħba, Victor Blasco, indirizza cross fil-kaxxa li sab lil LUKE LUKOVIC li mill-viċin tefa’ ġewwa.
Balzan komplew jesprimu logħob sabiħ u fl-34 minuta, xutt ta’ Dimeji Awosanya minn pożizzjoni angolata ġie salvat tajjeb mill-goalkeeper David Udoh Akpan.
Fil-41 minuta, Balzan resqu viċin li jaqilbu l-iskor favur tagħhom meta Alexander Ayo Akpan għadda tajjeb lejn Jankovic li kellu t-tentattiv tiegħu mill-viċin jiġi salvat parzjalment minn Akpan biex mir-rebound Jan Busuttil minn taħt il-lasta tefa’ inkredibbilment barra.
Fil-45 minuta, Balzan tilfu opportunitá oħra ta’ skor meta minn kontrattakk veloċi, Blasco għadda tajjeb lejn Jan Busuttil li minn quddiem Akpan reġa’ xeħet barra.
Fit-48 minuta, Balzan marru fil-vantaġġ meta xutt ta’ Jan Busuttil kważi minn nofs il-ground ġie devjat għal ġewwa minn Clayton Failla, biex b’hekk irriżulta auto-goal sfortunat.
Fis-76 minuta, Mosta kisbu d-draw meta Clayton Failla xeħet cross li sab lil ZACHARY BRINCAT li b’daqqa ta’ ras preċiża għeleb lill-goalkeeper ta’ Balzan, Dylan Ciappara.
Iżda d-drama kienet għadha ma ntemmitx hawn meta, fil-85 minuta, Balzan skorjaw il-goal tar-rebħa meta Luke Lukovic xeħet cross fil-kaxxa, bil-ballun jasal għand ALEXANDER AYO AKPAN, li mill-viċin spara ġewwa.
BALZAN: 1-Dylan Ciappara, 5-Samir Arab, 7-Triston Caruana, 10-Jan Busuttil, 14-Dimeni Arsnaya, 17-Henri Braham Stanic, 18-Luka Jankovic (8-Nicholas Pulis 79), 21-Luke Lukovic, 23-Victor Blasco (11-Benjamin Hili 87), 27-Alexander Ayo Akpan (9-Isaac Westendorf 94), 42-Rafael da Silva Floro – Coach: Darryl Willard
MOSTA: 22-David Udoh Akpan, 4-Prince Afriyie, 5-Sasha Cachia, 6-Larsson Coulibaly (23-Joshua Agyemang 66), 9-Souleymane Kone, 10-Giancarlo Goncalves, 13-Clayton Failla, 21-Nathan Agius, 30-Sunday Okereke, 31-Jooa Victor Teixeira, 96-Oumar Yacoube Bamba (77-Zachary Brincat 66) – Coach: Joseph Grech
REFEREE: Alex Johnson
ASS. REFEREES: Jurgen Spiteri, Thomas Debono
RABA’ UFF: Fyodor Zammit
SKORERS: G. Goncalves 14, Z. Brincat 77 (M), L. Lukovic 26, C. Failla og 48, A. A. Akpan 86 (B)
AMMONITI: G. Goncalves, J. Agyemang (M)
