Minn Cristian Muscat
Gudja United …..0
Birkirkara ………..1
Birkirkara kisbu rebħa meritata ta’ 1-0 kontra Gudja United biex qabżu waħedhom fit-tielet post fejn saħansitra għaddew ukoll lil Hamrun Spartans.
Bla dubju, il-Karkariżi kienu l-aħjar team matul id-90 minuta fejn dehru tattikament organizzati u dixxiplinati.
Min-naħa l-oħra, meta wieħed iqis il-wirjiet tal-aħħar tliet partiti fejn kisbu punti massimi, wieħed stenna aħjar minn Gudja United li dehru kemmxejn traskurati f’diversi żoni tal-ground.
Għall-kronaka, Birkirkara fetħu l-iskor fl-20 minuta permezz ta’ free-kick mill-isbaħ ta’ DIEGO VENANCIO li ma ta l-ebda ċans lill-goalkeeper, Glenn Zammit, isalva.
Fit-38 minuta, il-coach ta’ Gudja, Thane Micallef, kien kostrett jeffettwa sostituzzjoni sfurzata meta weġġa’ Tensior Gusman, biex minfloku daħal jilgħab il-Brażiljan, Marcelo Dias.
Eżattament qabel tmiem l-ewwel taqsima, il-Gudjani kellhom ċans tad-deheb li jiksbu d-draw meta Ahinga Selemani mill-viċin ħareġ l-aħjar tal-goalkeeper żagħżugħ Amara Sylla, li salva goal ċert.
Kien biss fit-73 minuta li waslet l-ewwel azzjoni denja ta’ nota fit-tieni taqsima b’Gudja jkunu huma li joħolqu l-periklu meta s-sostitut Marcelo Dias għadda tajjeb lejn Gabriel Mensah iżda Amara Sylla kien pront u ħareġ minn postu biex interċetta kull periklu.
Huma komplew jippressaw għall-goal tad-draw u żewġ minuti biss wara Gabriel Mensah kellu xutt mid-distanza li reġa’ sab lil lill-goalkeeper Karkariż attent li salva tajjeb minn mal-art.
Gudja komplew jinsistu u erba’ minuti mit-tmiem reġgħu heddew meta Mensah ikkontrolla tajjeb ix-xutt sabiħ minn pożizzjoni angolata li ġie mxellef f’corner minn difensur tal-Istripes.
Birkirkara komplew jamministraw il-vantaġġ minimu li kellhom sa tmiem il-partita, b’Gudja jagħmlu minn kollox biex jippruvaw jinfiltraw lid-difiża avversarja iżda din kienet ferm kompatta u annullat għal kollox l-attakki tagħhom.
GUDJA U.: 1-Glenn Zammit, 5-Matias Muchardi, 9-Tensior Gusman (99-Marcelo Dias 38), 13-James Arthur, Gabriel Mensah, 19-Bienvenu Selemani Ahinga, 22-Hubert Vella (7-Aidan Jake Friggieri 82), 23-Neil Tabone, 25-Juan Ramires Bolanos, 81-Neil Micallef, 92-Nika Dzalamidze (10-Llyewelyn Cremona 76) – Coach: Thane Micallef
BIRKIRKARA: 12-Amara Sylla, 5-Enrico Pepe, 6-Yannick Yankam, 7-Luke Montebello (14-Johnson Nsumoh 81), 8-Claudio Bonanni, 21-Ryan Scicluna, 23-Bismark Ngissah (20-Federico Falcone 46), 25-Oscar Carniello, 27-Leandro Aguirre, 30-Kilian Bevis (11-Kurt Zammit 91), 77-Diego Venancio – Coach: André Paus
REFEREE: Ishmael Barbara
ASS. REFEREES: Roberto Vella, Duncan Sultana
RABA’ UFF: Emanuel Grech
SKORER: D. Venancio 20 (B)
AMMONITI: O. Carniello, E. Pepe (B)
