Fl-istudju ppreżentat mill-Ministeru tal-Edukazzjoni l-ġimgħa l-oħra, irriżulta li ż-żieda ta’ studenti b’imġiba differenti fil-klassi u d-dixxiplina huma fost l-akbar sfidi li qegħdin jiffaċċjaw l-edukaturi fl-iskejjel tal-istat . Il-kelliem għas-sezzjoni tal-edukazzjoni fi ħdan il-General Workers’ Union (GWU), Gabriel Pullicino, qal lil dan is-sit li dan huwa studju importanti li għandhu jiġi attwat minħabba li b’mod ċar ħafna, leħen l-edukatur qiegħed jgħidilna x’inhuma l-ostakli.
Bħala l-akbar Unjin f’Malta b’sezzjoni ġdida fis-settur edukattiv, il-GWU tħoss li hemm tliet punti importanti ħafna li ħarġu minn dan l-istudju u li għandhom ikunu indirizzati mill-aktar fis possibbli. Dawn huma d-dixxiplina, ix-xogħol ta’ kitba (paper work) eċċessiv u r-riformi.
F’waħda mill-mistoqsijiet mogħtija lill-kapijiet tal-iskejjel dwar iż-żamma tad-dixxiplina fl-iskola, aktar minn nofshom (53.4%) irrispondew li din hija ta’ sfida. Barra minnhekk, min-naħa tal-għalliema tal-Primarja, jiġifieri li fiha jattendu studenti bl-etajiet ta’ bejn il-ħames u l-10 snin, kważi kollha (90.5%) qalu li ż-żieda fl-ammont ta’ tfal b’imġiba differenti fil-klassi hija wkoll sfida li jridu jgħelbu waqt il-ħin tax-xogħol tagħhom.
Il-mod ta’ kif il-bniedem iħares lejn l-awtorità nbidel…
Gabriel Pullicino qal li dawn iċ-ċifri juru kemm id-dixxiplina hija sfida ewlenija fil-klassijiet u fl-iskejjel. “Is-soċjetà ta’ kuljum qiegħda tinbidel u r-relazzjonijiet inbidlu wkoll. Dan ifisser li l-bniedem biddel il-mod ta’ kif iħares lejn l-awtorità. Din id-differenza qiegħda tidher b’saħħitha fl-iskejjel ukoll. Għalhekk hija mistennija li l-edukaturi jqisu d-dixxiplina bħala sfida,” kompla Gabriel Pullicino.
Ir-rappreżentant tas-sezzjoni tal-edukaturi fil-GWU qal li biex din l-isfida tinbidel f’opportunità, huma jissuġġerixxu li l-edukaturi jingħataw is-sostenn kollu meħtieġ li jinkludi sapport soċjali u taħriġ marbut mal-eżiġenzi soċjali. Barra minnhekk, jingħad ukoll li għandhom jiżdiedu s-servizzi soċjali fl-iskejjel għal istudenti.
It-tieni sfida għall-edukaturi li ilha tinħass għal dawn l-aħħar snin, hija x-xogħol ta’ kitba li jridu jagħmlu bħala parti mix-xogħol tagħhom. 89.3% tal-għalliema fil-Primarja qalu li l-assessjar, kitba ta’ kuljum, l-iskemi tax-xogħol tas-suġġetti kollha huma ta’ sfida kbira għalihom. Dan il-paperwork biex ma jitnaqqasx mill-ħin tal-lezzjonijiet, għal uħud mill-edukaturi sar piż wara l-ħin tax-xogħol minħabba li qiegħed jittieħed biex isir mid-dar.
“Bi qbil b’saħħtu, l-edukaturi qablu li l-akbar sfida li għandhom hija l-paper work. Din tinkwetana ħafna għax minħabba dan ix-xogħol, l-edukaturi m’humiex ilaħqu jagħmlu ix-xogħol proprju tagħhom. Anzi, ħafna drabi biex ilaħħqu jagħmlu kemm ix-xogħol amministrattiv kif ukoll dak marbut mat-tagħlim, qiegħed jkollhom ikomplu jaħdmu mid-dar,” spjega Pullicino.
Għall-GWU din hija sitwazzjoni inkwetanti għax bħala Unjin temmen li kulħadd għandu dritt igawdi l-ħajja tiegħu personali u familjari tiegħu. Min-naħa tiegħu Pullicino huwa konvint li jekk tali xogħol amministrativ jiġi ċċentralizzat u jiġu impjegati ħaddiema amministrattivi oħra, dan il-paper work jkun jista jiġi pprejotizzat u mqassam b’iktar effiċjenza.
“L-edukaturi għandhom ikunu involuti u kkonsultati”
- It-tielet punt li s-sezzjoni tal-edukaturi fil-GWU tħoss li għandu jkun indirizzat huwa r-riformi fis-settur. Pullicino qal li, “l-edukazzjoni huwa settur dinamiku ħafna għalhekk kontinwament jkun hemm bżonn ta’ bidliet u riformi. Madankollu dawn il-bidliet joħolqu stress kontinwu fuq l-edukaturi. Għaldaqstant f’dan l-istudju l-edukaturi individwaw dawn ir-riformi bħala sfidi. Aħna nisħqu li l-edukaturi għandhom jiġu involuti aktar f’dawn ir-riformi u jiġu kkonsultati b’mod sħiħ”.
- L-Unjin qiegħda titlob dan biex l-edukaturi jkunu parti mir-riforma mil-bidunett u iħossuhom parteċipi fis-settur tal-professjoni tagħhom. Pullicino qal li huwa importanti wkoll li l-edukaturi jiġu mħarġa b’mod sħiħ biex ikunu l-huma stess li imexxu tali riformi.
Ir-rappreżentant tal-GWU qal li tali studju huwa ta’ importanza kbira għas-settur edukattiv lokali għax b’mod xjentifiku jitfa’ dawl fuq dawk l-isfidi li l-edukaturi jgħixu ta’ kuljum. Huwa sostna li dan huwa pass ‘il quddiem li l-Ministeru attwali qiegħed jagħmel biex flimkien mal-edukaturi u l-imsieħba l-oħra, nibnu edukazzjoni sostenibbli billi nsaħħu l-pedament tagħna, li huma l-edukaturi kollha.
Gabriel Pullicino temm billi nkoraġixxa biex ma narawx dan l-istudju bħala detterent jew bħala rapport skorraġanti imma bħala opportunità unika biex insaħħu l-edukazzjoni li hija l-qofol ta’ soċjetà b’saħħita.
