Dalgħodu qomna b’aħbar oħra kerha bit-telfa mhux mistennija ta’ talent ieħor Malti. Din id-darba huwa Chris Scicluna li flimkien ma’ martu Moira fl-1994 irrappreżentaw lil Malta fil-Eurovision kontest bil-kanzunetta “More Than Love”. Huwa miet fl-għomor ta’ 62 sena.
Chris mhux biss maħbub immens minn martu u l-familja tiegħu, imma huwa f’qalb ħafna Maltin li mal-aħbar taw il-kondoljanzi tagħhom fuq il-midja soċjali, kif ukoll esprimew sogħba għal din it-telfa.
“Qsamna ħafna esperjenzi mill-isbaħ flimkien kemm għax inħobbu t-tnejn li aħna l-mużika, kif ukoll bħala koppja miżżewġa. Inħobbok CHris… issa qiegħed ma’ missierek”
MOIRA STAFRACE
Martu Moira f’post ta’ qsim il-qalb ħabbret il-mewt ta’ żewġha fejn qalet li, “b’qalbna maqsuma biċċiet se jkollna nagħtu l-aħħar tislima lill-għażiż raġel tiegħi Chris, missier it-tifla tagħna Michela. Huwa kien l-aqwa ħabib tiegħi, mentor fil-mużika, sieħeb fl-ivjaġġar u d-dell tiegħi għal dawn l-aħħar 27 sena”.
Fil-messaġġ tagħha hija rringrazzjatu għall-ħajja sabiħa li kellhom flimkien mimlija mħabba u passjoni għall-mużika. “Qsamna ħafna esperjenzi mill-isbaħ flimkien kemm għax inħobbu t-tnejn li aħna l-mużika, kif ukoll bħala koppja miżżewġa. Inħobbok Cris… issa qiegħed ma’ missierek,” temmet Moira Stafrace.
