Il-president tal-FA Brażiljana, Ednaldo Rodrigues, ħabbar li f’Ġunju 2024 Carlo Ancelotti se jinħatar coach tal-Brażil wara li jintemmlu l-kuntratt ma’ Real Madrid.
Rodrigues qal dan waqt konferenza stampa hekk kif ġie ppreżentat il-coach il-ġdid tal-Brażil, Fernando Diniz.
Peró, l-istess Rodrigues sostna li Diniz se jibqa’ fit-tmexxija għal sena biss.
“Is-sistema ta’ Diniz hija verament simili tal-coach Ancelotti li fi tmiem ta’ Ġunju li ġej se jkun is-suċċessur tiegħu,” qal il-president Brażiljan.
Il-federazzjoni Brażiljana għadha ma kkonfermatx il-ħatra ta’ Ancelotti permezz ta’ stqarrija uffiċjali. Min-naħa l-oħra, Real Madrid għadhom ma kkonfermawx it-tluq tal-coach Taljan.
Diniz huwa l-coach attwali ta’ Fluminense u mhux se jħalli lill-club fiż-żmien tiegħu biex iservi lit-team nazzjonali Brażiljan. Peró huwa jassumi r-responsabbiltajiet meta t-team ikun se jilgħab.
Ancelotti irritorna ma’ Real Madrid fl-2021 wara l-ewwel avventura tiegħu li kienet bejn l-2013 u l-2015.
Matul dawn is-sentejn huma mexxihom għal żewġ suċċessi fil-UEFA Champions League kif ukoll ir-rebħ tal-Kampjonat Spanjol.
