Corinna Schumacher, mart il-leġġenda tal-Formula 1 Michael Schumacher, tidher tiġġieled id-dmugħ waqt li tagħti ħarsa rari lejn żewġha f’intervista emozzjonanti għal dokumentarju ġdid ta’ Netflix.
Id-dokumentarju, intitolat Schumacher ’94 – The Birth of a Legend, se joħroġ fit-2 ta’ Ottubru u se jiffoka fuq l-istaġun tal-1994, meta Schumacher, ta’ 25 sena, rebaħ l-ewwel Kampjonat Dinji tal-Formula 1 tiegħu.
Corinna, li żżewġet lil Schumacher fl-1995, tispjega li ftit nies jafu lil Michael kif tafu hi. Hija titkellem ukoll dwar il-mewt traġika ta’ Ayrton Senna u Roland Ratzenberger waqt il-Grand Prix ta’ San Marino, li ġiegħlet lil dawk qrib Schumacher jirrealizzaw kemm il-karriera tiegħu kienet perikoluża.
Il-filmat se jinkludi wkoll persuni importanti mill-karriera ta’ Schumacher, fosthom l-eks manager tiegħu Willi Weber, Flavio Briatore u Bernie Ecclestone. Madankollu, għadu mhux magħruf jekk Corinna hix se tipprovdi informazzjoni ġdida dwar il-kundizzjoni tas-saħħa tiegħu.
Schumacher sofra ġrieħi serji f’inċident waqt skiing fl-Alpi Franċiżi f’Diċembru 2013. Minn dak iż-żmien, il-familja żammet id-dettalji dwar il-kundizzjoni tiegħu privati. Corinna qalet li l-familja qed tipproteġih bl-istess mod kif hu dejjem ipproteġa lilhom.
