Se jkun meħtieġ decider bejn Ħamrun Bayern A u Qormi Hockey Club A sabiex jiġi determinat min se jirbaħ il-kampjonat tal-Ewwel Diviżjoni tad-darts. Fil-fatt dawn iż-żewġ timijiet rebħu l-logħbiet rispettivi tagħhom u spiċċaw bl-istess numru ta’ punti fil-klassifika. Din id-decider se tintlagħab nhar il-Ġimgħa li ġej fi stabbiliment f’Marsaskala.
Qormi Hockey A għelbu lil Floriana Ajax MCP B 7-1 filwaqt li Ħamrun Bayern A batew aktar milli mistenni sabiex għelbu l-isfida ta’ Floriana Ajax MCP A 5-3.
Ħamrun Education Men għelbu lil PO’s Bar 6-2 filwaqt li Sliema Inter DC u Manchester Conquest Pub temmew l-impenji tagħhom staġjonali fi dro interessanti ta’ 4-4.
Mill-kampjonat tat-tieni diviżjoni, sar magħruf li Qormi Hockey Club B huma ċ-champions wara li għelbu lil White Hart 5-3. Anke Top Gun għelbu lil Fgura Darts B bl-istess skor filwaqt li Ħamrun Bayern B u Munchies Buġibba ixxalaw u rebħu 8-0 u 7-1 kontra Birżebbuġa St Peters u Żurrieq FC rispettivament.
Fit-tielet diviżjoni, Beland Bull’s Eye u Qormi Hornets temmew il-konfront ta’ bejniethom fi dro eċitanti ta’ 4-4 bl-istess skor jiġi reġistrat fil-logħba bejn Mqabba tal-Ġilju u St Paul’s Diamonds.
Cox Bar kisbu rebħa importanti ta’ 5-3 fuq Education Ladies filwaqt li Fgura Darts A għelbu lil Mqabba FC 6-2.
