“L-istaġun tal-lampuki jidher li għaddej b’suċċess u qabad ritmu tajjeb ħafna. Ninsabu sodisfatti bil-progress li sar s’issa, kemm mill-kwantità kif ukoll mill-valur tas-sajda. Sa minn meta fetaħ l-istaġun fil-15 ta’ Awwissu sal-27 ta’ Awwissu, inqabdu madwar 42 tunnellata ta’ lampuki, li jammontaw għal valur ta’ €263,000. Dawn ir-riżultati juru andament pożittiv u jikkonfermaw li l-istaġun sejjer tajjeb.”
Ħabbret dan is-Segretarju Parlamentari għas-Sajd, l-Akwakultura u d-Drittijiet tal-Annimali Alicia Bugeja Said f’kummenti li tat lil dan is-sit b’rabta mal-istaġun tal-lampuki, ir-riżultati miksuba sa issa u l-miżuri li qed jittieħdu biex ikomplu jiġu megħjuna s-sajjieda lokali b’mod partikolari f’dan l-istaġun li jkun wieħed impenjattiv ferm għalihom.
Is-Segrearju Parlamentari Bugeja Said bdiet billi qalet li bħala Gvern, qegħdin ikomplu jsaħħu l-appoġġ lis-sajjieda lokali permezz ta’ diversi miżuri konkreti. “Qed nagħtu importanza lill-ħtiġijiet tagħhom speċjalment matul l-istaġun tal-lampuki, li hu wieħed mill-aktar impenjattivi tas-sena. Fost l-inizjattivi ewlenin hemm l-għajnuna finanzjarja biex jiġi ffaċilitat il-proċess tas-sajd u nkomplu ngħinu lis-sajjieda sabiex jagħmlu investiment fuq il-bastimenti tagħhom kif ukoll l-investiment f’infrastruttura moderna fil-portijiet. L-għan tagħna hu li niżguraw li s-sajjieda jibqgħu appoġġjati sabiex ikomplu jikbru fis-settur marittimu.”
Is-Segretarju Parlamentari għamlet referenza wkoll għal numru ta’ skemi ffinanzjati minn fondi Ewropej li tħabbru fl-aħħar xhur – Investiment Abbord il-Bastimenti tas-Sajd, Bdil u Modernizzar ta’ Magni, u Skema ghal-Miżuri ta’ Diversifikazzjoni fis-settur tas-sajd.
Dawn l-iskemi jinsabu miftuħa u se jibqgħu miftuħa sal-aħħar tas-sena d-dieħla sakemm il-budget jippermetti u kull 3 xhur jinġabru l-applikazzjonijiet sottomessi u jigu evalwati. Dawn l-iskemi jikkumplimentaw skemi ffinanzjati minn fondi nazzjonali bħal Skema ta’ Restawr ta’ Bastimenti tas-sajd tradizzjonali kif ukoll skema għal xiri ta’ rkaptu sostenibbli.
“Qatt m’aħna ser inħallu lis-sajjieda tagħna jitpoġġew fi żvantaġġ minn min jikser ir-regolamenti”
Lis-Segretarju Parlamentari Bugeja Said saqsejnieha wkoll dwar x’passi qegħdin jittieħdu biex ikunu salvagwardjati l-interessi tas-sajjieda Maltin minn allegati attivitajiet illegali.
Hija semmiet kif wara li wasal rapport dirett mingħand sajjied, il-korpi responsabbli ħadu azzjoni immedjata sabiex jiġi investigat l-allegat sajd illegali minn bastimenti Tuneżini. “Grazzi għall-kollaborazzjoni mal-EFCA u l-preżenza tagħhom abbord l-Ocean Sentinel, irnexxielna nidentifikaw attivitajiet illegali fuq iċ-ċimi ta’ sajjieda Maltin u nintervjenu fil-ħin.”
“Bħala Gvern irridu nkunu ċari, li dawn l-abbużi mhumiex aċċettabbli u qatt m’aħna ser inħallu lis-sajjieda tagħna jitpoġġew fi żvantaġġ minn min jikser ir-regolamenti. Għalhekk se nkomplu nagħtu prijorità lill-infurzar permezz ta’ aktar spezzjonijiet u kooperazzjoni kontinwa mal-awtoritajiet Ewropej sabiex nassiguraw li jkun hemm ġustizzja u li l-baħar tagħna jibqa’ mħares,” hija żiedet tgħid.
“Fil-laqgħat li nattendu barra minn Malta kemm f’fora Ewropej bhall-Kunsill tal-Ministri, Working Parties etc, kif ukoll fil-Fora reġjonali bħall-GFCM, Malta hija vuċi kostanti b’saħħitha kontra dawn il-prattiċi ta’ Sajd illegali. Fil-fatt din kienet waħda mir-raġunijiet għaliex il-Kummissarju Ewropew il-ġdid responsabbli mis-Sajd Costas Kadis żar Malta f’Ġunju li għadda, fl-ewwel xhur tal-mandat tiegħu, propju biex jara b’għajnejh u jiltaqgħa personalment mas-sajjieda biex jisma l-weġgħat u d-diffikultajiet tagħhom minn dan is-sajd illegali.
“F’Ġunju wkoll rajna delegazzjoni tal-EFCA iżżur Malta u bil-bastiment Ocean Sentinel jidħol Malta diġa darbtejn dan is-sajf, propju għaliex Malta qiegħda twassal vuċi b’saħħitha fil-fora kollha u dan se nkomplu nagħmluh fix-xhur li gejjin sabiex nassiguraw li dawk li jinqabdu jwettqu sajd illegali, naraw li jittieħdu passi konkreti kontrihom. Fl-ahhar u mhux l-inqas ir-regolament immexxi mill-MEP Malti Thomas Bajada se tkun għodda ohra li se tagħtina iktar saħħa biex dan isir,” tenniet is-Segretarju Parlamentari.
“L-appell tiegħi hu wieħed ċar. Napprezzaw u nagħtu prijorità lill-ħut frisk li jaqbdu s-sajjieda tagħna”
Finalment hija appellat biex napprezzaw u nagħtu prijorità lill-ħut frisk li jaqbdu s-sajjieda lokali. Qalet li meta nagħmlu dan, mhux biss inknu qed nieklu prodott frisk, imma nkunu wkoll qed nagħtu sostenn dirett lis-sajjieda u lill-familji tagħhom, u b’hekk nsaħħu wkoll l-ekonomija lokali. “Il-fiduċja u l-appoġġ tagħkom jagħmlu differenza kbira fil-ħajja ta’ dawn in-nies li kuljum joħorġu jaħdmu fuq il-baħar.”
Is-Segretarju Parlamentari Bugeja Said fakkret ukoll li qed jiġu organizzati bosta attivitajiet mill-Ministeru sabiex jippromwovu l-prodott lokali bħal Festa Tonn. “Issa se jkollna żewġ edizzjonijiet ta’ Festa Ħut fid-19 u l-20 ta’ Settembru fil-Mellieħa u Marsaxlokk rispettivament.”
“Fl-aħħar u mhux l-inqas id-Dipartiment tas-Sajd għadu kif ingħata fondi Ewropej sabiex matul it-tliet snin li ġejjin iwettaq kampanja informattiva u edukattiva dwar speċi ta’ ħut li mhux daqstant popolari mal-Maltin u l-Għawdxin u l-beneffiċċji ta’ diversifikazzjoni, sostenibbilità u ta’ valur nutrittiv għoli jekk wieħed jikkonsma minn dan il-ħut lokali u li ħafna drabi ikun ferm iktar affordabbli,” temmet tgħid is-Segretarju Parlamentari Alicia Bugeja Said.