21 ta’ Ottubru 2026 – Valletta, Malta: Django 7x ta’ Giovanni Lombardi Stronati ġiet iddikjarata r-rebbieħa overall tas-47 edizzjoni tar-Rolex Middle Sea Race, u b’hekk kisbet wieħed mill-aktar trofej prestiġjużi fit-tlielaq tal-jottijiet offshore, wara prestazzjoni eċċellenti tul ir-rotta ta’ 606 mili nawtiċi. Illum, fil-11:30 CEST, ir-Royal Malta Yacht Club (RMYC) ikkonferma li l-ebda wieħed mill-jottijiet li kienu għadhom qed jikkompetu ma seta’ jtejjeb il-ħin ikkoreġut skont l-IRC ta’ Django 7x.
Ir-rebħa tat-tim Taljan waslet wara dwell straordinarju maċ-champion renjanti Balthasar, biż-żewġ jottijiet ibaħħru qrib xulxin għal parti kbira tar-rotta, qabel ma Django 7x temmet it-tellieqa 39 minuta qabel ir-rivali tagħha.
Wara l-eċċitament tal-bieraħ fil-klassijiet IRC 1 u IRC 2, bdew jiġu stabbiliti aktar pożizzjonijiet fuq il-podju tal-klassijiet differenti, u dan kompla jżid mal-atmosfera ta’ ċelebrazzjoni.
IRC 3 – Artie III tikseb rebħa Maltija
Artie III ta’ Lee Satariano, bi Christian Ripard bħala ko-skipper, rebħet l-IRC 3 b’vantaġġ ta’ madwar tliet siegħat fuq il-ħin ikkoreġut, wara prestazzjoni impressjonanti li rat lill-jott fuq quddiem fil-klassi tiegħu għal kważi t-tellieqa kollha.
Artie III kienet ukoll l-ewwel jott Malti li temm it-tellieqa. Il-prestazzjoni b’saħħitha tagħha fl-ewwel stadji, partikolarment f’kundizzjonijiet ta’ riħ favorevoli għall-jott, wasslet lit-tim temporanjament fil-quċċata tal-klassifika ġenerali proviżorja tal-IRC.
Satariano spjega: “Konna nafu li fil-bidu l-kundizzjonijiet kienu favur tagħna. Naf sew x’jogħġob lil dan il-jott – ħafna riħ mill-ġenb u minn wara, f’kundizzjonijiet ta’ riħ moderat sa qawwi. Kellna aktar riħ milli konna qed nistennew, u dan kien bonus tajjeb.”
Għal Ripard, li kien qed jikkompeti fir-Rolex Middle Sea Race għas-36 darba, rekord fih innifsu, ir-riżultat kien partikolarment sodisfaċenti.
“Dan ifisser ħafna għalija għax l-ekwipaġġ ħadem ħafna,” qal Ripard. “Din it-tellieqa titlob impenn kontinwu. Kważi qatt ma jkollok ċans toqgħod bilqiegħda jew tinżel taħt il-gverta għal aktar minn siegħa u nofs mingħajr ma tinbidel xi ħaġa.”
IRC 4 – Elusive 2 tirbaħ wara dwell mill-aktar eċċitanti
Waħda mill-aktar battalji missielta tat-tellieqa ntemmet b’Elusive 2 tal-familja Podesta tegħleb lill-jott Malti l-ieħor, Ton Ton Laferla ta’ Jonathan Gambin, fuq il-ħin ikkoreġut fl-aħħar mumenti tat-tellieqa.
Ton Ton Laferla kienet żammet il-vantaġġ għal parti kbira tar-rotta, iżda Elusive 2 gradwalment irnexxielha tnaqqas id-distakk f’konfront straordinarju bejn żewġ rivali stabbiliti.
Għall-ekwipaġġ ta’ Elusive 2, ir-rebħa kienet frott ta’ sforz kbir.
“Din kienet waħda mill-aktar tlielaq diffiċli mentalment,” qal Aaron Podesta. “Li nibqgħu nagħmlu l-almu tagħna minn Lampedusa sal-linja finali u jirnexxilna niksbu l-ewwel post fil-klassi hija sodisfazzjon enormi.”
It-triq għar-rebħa ma kinitx faċli. Mhux biss l-ekwipaġġ kellu jipprova jirkupra d-distakk matul it-tellieqa kollha, iżda skopra wkoll ostaklu mhux mistenni li kien qed ixekkel il-prestazzjoni tal-jott.
IRC 5 – Courrier Pogo ttemm b’veloċità impressjonanti
Géry Trentesaux ta prestazzjoni memorabbli abbord il-jott il-ġdid tiegħu, Courrier Pogo, fil-klassi IRC 5.
B’ekwipaġġ ta’ erba’ persuni biss, it-tim esperjenzat għadda minn tellieqa b’kundizzjonijiet varjati, iżda temmha fuq nota pożittiva b’passaġġ lura lejn Malta b’veloċità spettakolari.
Wara li sabu żoni b’nuqqas ta’ riħ li fixklu l-progress tagħhom fl-ewwel stadji, il-jott Franċiż beda juri l-potenzjal tiegħu fil-kundizzjonijiet aktar qawwija fin-Nofsinhar ta’ Sqallija.
Hu u l-ekwipaġġ tiegħu ilhom ibaħħru flimkien għal għexieren ta’ snin, u żviluppaw intuwizzjoni u ftehim reċiproku li wrew li huma ta’ valur kbir matul it-tellieqa.
IRC 6 u IRC Two-Handed – Rebħa doppja għal Colombre
Massimo Juris u Pietro Luciani kisbu rebħa doppja impressjonanti abbord il-jott Taljan Colombre, billi rebħu kemm l-IRC 6 kif ukoll id-diviżjoni IRC Double-Handed.
Is-sħubija bejn iż-żewġ baħħara tmur lura aktar minn għaxar snin u tinkludi parteċipazzjoni preċedenti fir-Rolex Middle Sea Race, kif ukoll suċċess fil-kategorija b’żewġ baħħara abbord Blue Colombre fl-2013.
“Ir-Rolex Middle Sea Race hija tellieqa ta’ prestiġju kbir,” qal Juris. “Aħna qegħdin fil-quċċata ta’ waħda mill-aktar klassifikazzjonijiet importanti, għaliex l-IRC 6 hija klassi kompetittiva ħafna. Ninsabu tassew, tassew kuntenti.”
Class40 u Multihull
Il-flotot tal-Class40 u tal-multihulls MOCRA komplew ukoll itemmu l-passaġġi impenjattivi tagħhom madwar Sqallija.
L-unuri tal-ewwel multihull li temm it-tellieqa (Multihull Line Honours), kif ukoll ir-rebħa fuq ħin ikkoreġut skont il-MOCRA, marru għal Calamity, taħt it-tmexxija tal-iskipper Kimmo Nordstrom.
Sadanittant, il-battalja fil-Class40 intrebħet minn Stella Nova ta’ Louis Torreilles wara konfront epiku ma’ Optimus Prime ta’ Ivica Kostelic, taħt it-tmexxija tal-iskipper Matic Vrecko.
Il-flotta tkompli tasal Malta
Filwaqt li l-premjijiet ewlenin tal-klassijiet jidhru li ġew deċiżi, is-47 edizzjoni tar-Rolex Middle Sea Race għadha għaddejja għall-jottijiet li baqgħu fuq il-baħar.
Kull ekwipaġġ għandu l-istorja tiegħu ta’ suċċess, diżappunt u esperjenzi ġodda, bil-prospett li jasal sal-linja finali f’Malta jservi bħala motivazzjoni qawwija wara tellieqa daqstant impenjattiva.
Sal-17:30 CEST, 65 jott kienu temmew it-tellieqa, 28 kienu għadhom qed jikkompetu u 14-il jott kienu rtiraw.
