Dr Daniel McKean laħaq tragward personali sinifikanti hekk kif temm il-100 partita tiegħu bħala tabib tat-team nazzjonali Malti tal-kbar, u b’hekk immarka għaxar snin ta’ servizz iddedikat lill-football Malti.
Il-vjaġġ ta’ Dr McKean mat-team nazzjonali beda fl-10 ta’ Ottubru 2015, meta Malta affrontat lin-Norveġja f’konfront internazzjonali. Għaxar snin wara, huwa ċċelebra l-100 dehra tiegħu f’ġimgħa partikolarment memorabbli għall-football Malti, hekk kif it-team nazzjonali kiseb l-ewwel post fi Grupp D1 tal-UEFA Nations League.
Matul dawn l-għaxar snin, Dr McKean kien parti integrali mill-istaff ta’ appoġġ tat-team nazzjonali, fejn ipprovda kura u assistenza medika lil diversi ġenerazzjonijiet ta’ players waqt kampanji internazzjonali, kompetizzjonijiet ta’ kwalifikazzjoni u partiti ta’ ħbiberija. Ir-rwol tiegħu kien jestendi ferm lil hinn mill-ġranet tal-logħob, u kien jinvolvi impenn, preparazzjoni u għadd ta’ sigħat ta’ ħidma biex jiżgura li l-players ikunu f’kundizzjoni tajba u lesti jirrappreżentaw lil pajjiżhom.
Meta rrifletta dwar dan it-tragward, Dr McKean iddeskriva bħala privileġġ il-fatt li serva lit-team nazzjonali kemm fil-mumenti ta’ suċċess kif ukoll f’dawk ta’ sfida. Huwa rrikonoxxa wkoll id-dedikazzjoni tal-players u tal-ħafna kollegi li qasmu din l-esperjenza miegħu.
Huwa rringrazzja wkoll lill-familja tiegħu, filwaqt li rrikonoxxa s-sagrifiċċji li jinvolvi dan ir-rwol, fosthom il-ħin li jqatta’ ‘l bogħod mid-dar u l-okkażjonijiet familjari li jkollu jitlef. Dan sar aktar importanti issa li huwa missier ta’ żewġt ibniet żgħar.
It-tragward ta’ 100 partita internazzjonali huwa xhieda tal-konsistenza, il-professjonalità u l-impenn li Dr McKean wera matul dawn l-aħħar għaxar snin.
Il-Malta FA awgurat lil Dr Daniel McKean għal dan it-tragward importanti u rringrazzjatu għad-dedikazzjoni u l-kontribut kontinwu tiegħu lit-team nazzjonali.
Biex titfakkar din l-okkażjoni speċjali, Dr McKean ingħata flokk personalizzat tat-team nazzjonali Malti, b’ismu u n-numru 100 fuqu, mill-viċi president tal-MFA, Dr Matthew Paris.
