Għal darba oħra l-poplu Malti u Għawdxi kollu ngħaqad biex ġabar is-somma sabiħa ta’ €5,279,000 f’L-Istrina.
Fost ċelebrazzjonijiet kbar, dawk preżenti offrew serata ta’ brijju, kant, mużika, ċajt u aktar hekk kif l-ammont tal-flus miġburin beda jaqleb minn miljun għall-ieħor.
Spikkat l-għaqda fejn b’għan wieħed, saħansitra membri parlamentari miż-żewġ partiti l-kbar nġabru biex filwaqt li jagħtu d-donazzjonijiet tagħhom, jieħdu l-opportunità biex iwieġbu t-telefonati.
Il-General Workers’ Union kienet fost dawk li ppreżentaw id-donazzjonijiet tagħhom għal din il-kawża ġusta.
Is-Segretarju Ġenerali tal-GWU Josef Bugeja flimkien mad-Deputat Segretarju Ġenerali tal-GWU Kevin Camilleri u l-President tal-GWU Victor Carachi preżentaw is-somma ta’ €2,000 b’risq il-Malta Community Chest Fund Foundation.
