Goal kmieni u ieħor tard poġġew lil Liverpool fil-quċċata tal-Premier League Ingliż meta marru għand Burnley u ħarġu rebbieħa bl-iskor ta’ 2-0.
Ir-Reds lagħbu partita aktar miż-żewġ timijiet li qed isegwuhom, Arsenal u Aston Villa.
Iż-żewġ goals waslu minn Darwin Nunez (5) u Diogo Jota (90) li kien għadu kif jirritorna minn injury.
Ir-rebħa setgħet kienet akbar iżda r-Reds kellhom żewġ goals minn Harvey Elliot u Cody Gakpo mħassra fuq deċiżjonijiet ferm diskutibbli.
Min-naħa ta’ Burnley ma ndirizzawx xutt lejn il-lasti avversarji.
Newcastle v Nottm F. – Newcastle United komplew għaddejjin bis-sensiela negattiva tagħhom meta f’darhom sfaw megħluba minn Nottingham Forest bl-iskor ta’ 3-1 biex din kienet is-sitt telfa tagħhom mill-aħħar seba’ ħarġiet fil-kompetizzjonijiet kollha.
Min-naħa tal-Forest, din kienet l-akbar rebħa ta’ dan l-istaġun u għamlu pass tajjeb lejn is-salvazzjoni taħt il-manager il-ġdid, Nuno Espirito Santo.
Kienu l-Magpies li fetħu l-iskor meta ngħataw penalty li minnu Alexander Isak (23) ma żbaljax.
Iżda l-eroj tal-Forest kien Chris Wood (45, 53, 60) li skorja hat-trick.
Bournemouth v Fulham – Bournemouth kisbu rebħa tajba fuq Fulham bl-iskor ta’ 3-0 biex telgħu f’nofs il-klassifika.
Wara bidu kwiet, iċ-Cherries skorjaw tliet darbiet mingħajr risposta minn Justin Kluivert (44), Dominic Solanke (62 pen) u Luis Sinisterra (92).
Sheffield U. v Luton – Luton Town irreġistraw rebħa mill-aktar importanti fit-tentattiv li jkompli jissieltu għas-salvazzjoni meta barra minn darhom għelbu lit-team ta’ qiegħ il-klassifika, Sheffield United 3-2.
Il-goals tagħhom waslu minn Alfie Doughty (17) u żewġ auto-goals ta’ Jack Robinson (77) u Anis Slimane (81) filwaqt li Oliver McBurnie (61) u Anel Ahmedhodzic (69) skorjaw għall-Blades.
