It-talent Malti tal-karting Eman Muscat assigura postu fil-Rotax MAX Challenge Grand Finals 2026. F’mument storiku għall-motorsport lokali, Muscat se jkun qed ixejjer il-bandiera nazzjonali bħala sewwieq Malti li se jikkompeti f’dan l-avveniment internazzjonali prestiġġjuż, li se jsir bejn is-7 u l-14 ta’ Novembru 2026 fil-korsa famuża tal-Kartódromo Internacional do Algarve f’Portimão, il-Portugall.
Muscat se jġorr it-tamiet ta’ pajjiżna fil-kategorija kompetittiva ħafna tar-Rotax MAX Senior, fejn se jikkompeti ras imb ras mal-aqwa talenti tal-karting minn madwar id-dinja. Il-Rotax World Finals huma meqjusa bħala wieħed mill-ogħla tragwardi fil-karting globali, u jirrikjedu l-aqwa prestazzjoni mis-sewwieqa li jikkwalifikaw minn kampjonati nazzjonali u reġjonali stretti madwar id-dinja.
Ir-rappreżentanza ta’ Malta fuq dan l-istadju internazzjonali hija pass kbir fil-karriera ta sewqan ta’ Muscat. Huwa se jmur il-Portugall bl-appoġġ sħiħ ta’ dawk qrib tiegħu, inkluż il-familja, it-tim EL Racing Team, u l-isponsors lokali tiegħu, li kollha kellhom rwol kruċjali biex iwassluh s’hawn. Muscat jinsab determinat li jagħti l-massimu tiegħu fil-Portugall biex jikseb l-aqwa riżultat possibbli kontra l-aqwa sewwieqa tad-dinja.
