Illum, iċ-Ċentru Interattiv tax-Xjenza Esplora ospita madwar 500 student minn Kinder 1 sa Year 6 għal avveniment kommemorattiv li jimmarka Jum il-Kottonera li jiġi ċċelebrat fit-23 ta’ Ottubru. L-avveniment laqqa’ flimkien ix-xjenza, l-iskoperta u t-tagħlim interattiv bħala parti minn sensiela ta’ attivitajiet.
L-istudenti gawdew minn esperjenza edukattiva attraenti li kkombinat l-esplorazzjoni, il-kreattività u l-iskoperta xjentifika. Il-programm kien jinkludi l-esplorazzjoni tal-esibizzjonijiet interattivi ta’ Esplora, l-attivitajiet free-play, wirja tax-xjenza u film fil-planetarium, li joffru lill-istudenti ta’ etajiet differenti l-opportunità li jiskopru kunċetti xjentifiċi f’ambjent impenjattiv u interattiv.
Għal dan l-avveniment kommemorattiv attendew il-Ministru għall-Ġustizzja, ir-Riċerka u l-Innovazzjoni, Clifton Grima; Joe Mizzi, President tal-Fondazzjoni Kottonera; Silvio Scerri, Uffiċjal Kap Eżekuttiv ta’ Xjenza Malta; u Mary Ann Cauchi, Senior Director taċ-Ċentru Interattiv tax-Xjenza Esplora.
Filwaqt li enfasizza s-sinifikat ta’ Jum il-Kottonera u l-importanza tal-edukazzjoni, ix-xjenza u l-innovazzjoni fl-ispirazzjoni tal-ġenerazzjonijiet żgħażagħ, il-Ministru Clifton Grima qal “L-għaqda bejn ix-xjenza u Jum il-Kottonera hija opportunità sabiħa biex nuru kif l-għarfien, l-edukazzjoni u l-innovazzjoni jistgħu jressqu lin-nies aktar qrib xulxin u tal-komunità li jgħixu fiha. Esplora, li jinsab fil-qalba tal-Kottonera, għandu rwol importanti biex ix-xjenza ssir esperjenza aċċessibbli, interessanti u interattiva għal kulħadd, b’mod partikolari għat-tfal u ż-żgħażagħ. Billi nkomplu ninvestu fil-kurżità, fit-tagħlim u fir-riċerka, inkunu qed nibnu soċjetà aktar infurmata, kreattiva u lesta għall-isfidi tal-futur.”
Joe Mizzi rrimarka dwar l-importanza ta’ inizjattivi li jiċċelebraw il-wirt u l-identità tar-reġjun. Huwa qal, “Fil-Fondazzjoni Kottonera, il-missjoni tagħna hija li ntejbu l-kwalità tal-ħajja permezz ta’ riġenerazzjoni sinifikanti li ttejjeb l-infrastruttura filwaqt li tissalvagwardja l-karattru storiku tar-reġjun. Billi niċċelebraw il-wirt għani, il-kultura u l-ispirtu komunitarju tal-Kottonera, għandna l-għan li nrawmu l-kburija, inħeġġu l-parteċipazzjoni u nispiraw responsabbiltà kondiviża għall-preservazzjoni tal-passat tagħna u għat-tiswir tal-futur tagħna.”
Silvio Scerri enfasizza l-importanza tal-impenn xjentifiku u l-edukazzjoni informali ta’ STEAM fl-inkoraġġiment tal-kurżità u l-ispirazzjoni tat-tfal minn età bikrija. Kompla li kien ta’ sodisfazzjon jara tant tfal jingħaqdu flimkien fl-Esplora biex jiskopru u jgawdu l-għeġubijiet tax-xjenza. “Inizjattivi bħal dawn iqarrbu lill-komunità tagħna filwaqt li jispiraw lill-ġenerazzjonijiet żgħażagħ tagħna biex jibqgħu kurjużi, jesploraw u joħolmu bil-kbir.”
Min-naħa tagħha, Mary Ann Cauchi qalet, “Bħala parti mill-komunità tal-Kottonera, irridu li t-tfal jaraw lil Esplora bħala post fejn jappartjenu, fejn il-mistoqsijiet tagħhom huma importanti u fejn jistgħu jitgħallmu permezz tal-iskoperta. Iċ-ċelebrazzjoni ta’ Jum il-Kottonera flimkien tgħaqqad il-kburija fil-wirt lokali tagħna mal-possibiltajiet li x-xjenza u l-kreattività joffru lill-ġenerazzjonijiet żgħażagħ tagħna.”
L-avveniment ifforma parti minn sensiela ta’ attivitajiet li se jwasslu għal Jum il-Kottonera fit-23 ta’ Ottubru, li jiċċelebraw il-wirt u l-identità tat-Tlett Ibliet filwaqt li jqarrbu x-xjenza u l-edukazzjoni lejn il-komunità lokali.