Serbja ……..…0
Ingilterra ……1
L-Ingilterra bdew l-impenji tagħhom fil-Euro 2024 b’rebħa 1-0 fuq is-Serbja grazzi għal goal ta’ Jude Bellingham.
Wara bidu qawwi, fit-tieni taqsima l-Ingliżi tilfu l-kontroll ta’ nofs il-ground biex ippermettew lis-Serbi jidħlu fil-partita u saħansitra kellhom il-mumenti tagħhom.
Mas-suffara inizjali, l-Ingilterra bdew jiddominaw il-pussess tal-ballun bis- Serbi jirtiraw lura biex jiffollaw id-difiża fit-tentattiv li jiffrustraw lill-avversarji tagħhom.
Peró, il-pjan tas-Serbi falla minħabba li, fit-13-il minuta, it-Three Lions fetħu l-iskor.
Bukayo Saka ġera mal- linja l-leminija u xeħet cross li kien devjat mid-difensur, Strahinja Pavlovic, biex għen lill-ballun jogħla li qabeż lid-difiża u sab lil JUDE BELLIGHAM li kien ġej bil-ġirja u b’daqqa ta’ ras stupenda sammar il-ballun fix-xibka.
Ir-reazzjoni tas-Serbi was -let fis-16-il minuta fejn resqu viċin li jiksbu d-draw meta Trent Alexander-Arnold tilef il-pussess tal-ballun barra l-kaxxa li ppermetta lil Aleksandar Mitrovic jinkwadra l-lasti iżda x-xutt tiegħu għadda jħakkek ma’ sieq il-lasta biex l-Ingliżi ħelsuha ħafif.
Iżda, fl-24 minuta, Alexander-Arnold patta għall-iżball meta kisser attakk tal-avversarji f’nofs il-ground … u xeħet lejn Kyle Walker li ħarab waħdu iżda minn pożizzjoni ideali pprefera li jixħet għan-nofs milli jispara l-ballun fix-xibka.
Fil-ħin miżjud tal-ewwel taqsima, is-Serbi heddew meta Nikola Milenkovic dendel cross perikoluż, bid- difensur, John Stones, ma jikklerjax sew iżda fortunatament ma kien hemm l-ebda player Serb li seta’ jagħmel il-ħsara.
Sitt minuti mill-ftuħ tat-tieni taqsima, id-difensur Kieran Trippier, kien providenzjali għall-Ingilterra meta antiċipa fil-ħin lil Andrija Zivkovic li kien qrib li jikkonkludi mill-cross ta’ Dusan Vlahovic.
Fis-59 minuta, is-Serbi appellaw għal penalty meta Trippier deher jagħmel kuntatt minimu ma’ Mitrovic iżda kien kollox normali għat-terna arbitrali.
Fis-76 minuta, l-Ingliżi kienu sfortunati meta s-sostitut, Jarrod Bowen, li kien ilu ftit minuti fil-ground, xeħet cross lejn Harry Kane li d-daqqa ta’ ras tiegħu ġiet salvata mill-goalkeeper, Predrag Rajkovic, megħjun mill-mimduda.
Fit-82 minuta, il-goalkeeper Jordan Pickford salva lill-Ingilterra meta xeħet f’corner ix-xutt ta’ Vlahovic.
Konxji mill-fatt li l-Ingliżi dehru għajjiena mentalment, fiżikament u mingħajr l-ebda enerġija, is-Serbi żiedu l-pressjoni iżda l-players tal-coach, Gareth Southgate, irreżistew sas-suffara finali.
Referee: Daniele Orsato (Italja)
