Kyren Wilson warrab għal kollox lil Barry Hawkins meta għelbu 9-3 biex kiseb il-ħames titlu ranking tal-karriera tiegħu b’rebħa fil-finali tal-European Masters li saret fi Stadthalle, Furth.
Il-Ġermanja hija post pjaċevoli għal Wilson, li issa rebaħ tlieta mill-ħames tournaments ranking hemmhekk. Furth, b’mod partikolari għandu memorji speċjali għall-player minn Kettering, peress li rebaħ ukoll il-Paul Hunter Classic fi Stadhalle fl-2018 u kien finalista fl-2019. Ir-rebħa tal-Ħadd temmet nixfa ta’ sentejn ta’ titlu ranking għal Wilson.
L-ogħla premju ta’ £80,000 wassal lil Wilson, 30 sena, sal-quċċata tal-klassifika tas-Sensiela BetVictor meta l-player li jakkumula l-aktar premjijiet ta’ flus matul it-tmien avvenimenti ta’ kwalifika se jingħata bonus ta’ £150,000. Ir-rebħa se tara wkoll lil Wilson jimxi mit-tmienja għas-sitt post fir-rankings mondjali.
Hawkins issa tilef l-aħħar erba’ finali rankings, kif ukoll sofra telfa fil-finali għat-titlu tal-Masters fl-istaġun li għadda. L-aħħar li għolla l-fidda kien fil-World Grand Prix 2017. Huwa telaq mill- Bavarja bil-konsolazzjoni tal- premju ta’ £35,000 bħala finalista.
Fl-ewwel sessjoni ta’ wara nofsinhar kien Wilson li ħareġ minn fuq b’vantaġġ ta’ 6-2, li ħallieh fil-bżonn ta’ tliet frames biss għat-titlu.
Wilson estenda l-vantaġġ tiegħu billi ħa l-ewwel frame tat-tieni sessjoni fuq is-sewda biex mar ħamsa fuq quddiem.
Madankollu, Hawkins wera r-reżiljenza tiegħu billi ħa l-10 wieħed biex iżomm lilu nnifsu fil-konfront meta għamilhom 7-3. Iżda kien għal xejn, hekk kif Wilson rebaħ tnejn wara xulxin biex qabeż il-linja tat-tmiem.
“It-tnejn tlifna l-ħin tagħna llum. Ikollok tgħid li aħna konna ż-żewġ players fil-forma din il-ġimgħa, ipproduċejna xi snooker mill-aqwa. Sempliċement ma ġarax għal kollox illum f’termini ta’ livell.
“Poġġejt moħħi fuq ir-rebħ bl-ikrah. Kollox kien li nikseb it-trofew u kont tassew kuntent li nagħmel dan,” qal Wilson.
Hawkins qal: “Jien diżappuntat ħafna. Kienet taqbida l-ġurnata kollha u l-mod kif marret il-logħba setgħet kienet 9-3 għalija. Nixtieq li kien. Kyren żamm mal- kompitu tiegħu u qabadni. Kienet ġurnata ħażina.”
Il-frames intemmu hekk: Wilson v Hawkins 9-3 – 66-17, 63-56, 70-32, 54-68, 7-106 (51, 55), 73-9, 79-17, 75-0 (56), 69-54 (Hawkins 64), 33-59, 83-27, 77-30.
It-tournament li jmiss se jsir mill-5 sal-10 ta’ Settembru fit-Tajlandja li huwa dak bl-invit, is-Six Red World Championship.
