Hibernians ……….2
Naxxar Lions ……0
Hibernians kisbu l-passaġġ għas-semi-finali tal-Merdianbet FA Trophy, fejn se jkunu qed jaffrontaw lil Hamrun Spartans, meta ftit li xejn tħabtu biex għelbu l-isfida ta’ Naxxar Lions bl-iskor ta’ 2-0, bil-goals għalihom jaslu wieħed f’kull taqsima.
B’koinċidenza dawn iż-żewġ timijiet se jerġgħu jiltaqgħu nhar il-Ħadd li ġej din id-darba f’partita valida mill-Malta Premier.
Kienu Hibernians li fetħu l-iskor proprju fl-ewwel periklu li ħolqu fit-12-il minuta meta LUCAS VILLELA evita lill-avversarju dirett tiegħu u b’xutt angulat għar-rokna tax-xibka tefa’ ġewwa, biex kompla jikkonfema forma mill-aqwa li jinsab għaddej minnha.
Huma komplew jiddettaw il-logħob u mal-kwarta logħob, Villela xeħet cross għan-nofs lejn Carvalho li kellu x-xutt mill-ewwel tiegħu jintemm ftit għoli.
Kulma jmur kompla d-dominju assolut tal-Pawlisti b’Villela jkompli jirriżulta bħala l-aqwa player fost sħabu u fl-24 minuta lagħab il-ballun għan-nofs fejn sab lil Dexter Xuereb żmarkat li iżda minn pożizzjoni ideali tefa’ għoli.
Hibernians reġgħu ħolqu l-periklu fl-40 minuta meta Alfred Silas xeħet cross lejn Rodrigo Khevin Fraga li niżżel il-ballun b’sidru qabel kellu x-xutt fil-baxx tiegħu mid-distanza jiġi salvat minn mal-art mill-goalkeeper ta’ Naxxar, Andre Fenech.
Fi-ftuħ tat-tieni taqsima, Naxxar ħarġu ferm aggressivi u fit-48 minuta kienu għoddhom ġabu l-iskor indaqs meta Fernando Barbosa Pereira kellu l-konklużjoni tiegħu mill-viċin salvata b’siequ mill-goalkeeper tal-Pawlisti, Pablo Nino Sanchez.
Iżda kienu Hibernians li rduppjaw l-iskor fis-57 minuta meta NATHA CARVALHO permezz ta’ konklużjoni b’saħħitha minn ġol-kaxxa ħasad għal kollox lil Fenech.
Kien biss fid-89 minuta li waslet l-azzjoni sussegwenti fil-partita, b’Naxxar ikunu huma li joħolqu l-periklu permezz ta’ xutt mill-isbaħ minn pożizzjoni ideali tal-Ġappuniż Takuma Yamaguchi li għadda jħakkek minn mal-wieqfa, bil-Pawlisti jeħilsuha ħafif.
Hibernians komplew jamministraw il-vantaġġ doppju li kellhom sa tmiem il-partita.
Hibernians: 1-Pablo Nino Sanchez, 4-Alfred Silas, 5-Kurt Shaw, 7-Lucas Villela (25-Timothy Eviparker 89), 8-Rodrigo Khevin Fraga (19-Stanislav Sorokin 72), 9-Natha Carvalho (17-Isaiah Chukunyere 63), 11-Bjorn Kristensen, 14-Dexter Xuereb, 16-Rui Bruno Ribeiro, 21-Alex Bruno De Souza Silva (23-Matthew Ellul 72), 31-Henrique Nunes Silva Coach: Branko Nisevic
Naxxar L.: 12-Andre Fenech, 3-Nikolai Micallef (28-Giuseppe Bonanno 66), 4-Bacary Sane, 7-Takuma Yamaguchi, 8-Neil Pace Cocks (10-Kayne Haber 66), 11-Tara Ndao, 15-Ryan Gilmour Cassar, 18-Hugo Dos Santos Coelho (10-Edson Cerqueira Farias 66), 25-Fernando Barbosa Pereira, 33-Joao Vitor Moura Cardoso (9-Edward Orlando Bolanos Angulo 66), 44-Ito Yasukaze (26-Mattias Micallef 79) Coach: George Vella
Referee: Malcolm Spiteri
Ass. Referees: Jurgen Spiteri, Paul Apap
Raba’ Uffiċjal: Joseph Scerri
Skorers: L. Villela 12, N. Carvalho 57 (H)
Ammoniti: N. Carvalho (H)