Total fittizju ta’ £830.69 miljun
| Staġun | Total mill-isponsors | Total oriġinali | Total Fittizju |
| 2009-10 | £27m | £4.5m | £22.5m |
| 2010-11 | £41.25m | £12.75m | £28.5m |
| 2011-12 | £86.75m | £16m | £70.75m |
| 2012-13 | £121.75m | £16m | £105.75m |
| 2013-14 | £127.5m | £16m | £111.5m |
| 2014-15 | £123.2m | £16m | £107.2m |
| 2015-16 | £136.17m | £16m | £120.17m |
| 2016-17 | £140.59m | £11m | £129.59m |
| 2017-18 | £145.73m | £11m | £134.73m |
Manchester City instabu ħatja mill-Premier League ta’ ksur serju tar-regoli finanzjarji fuq perjodu ta’ disa’ snin, wara investigazzjoni li damet għaddejja għal diversi snin.
Kummissjoni indipendenti magħmula minn tliet persuni sabet li l-club artifiċjalment ‘nefaħ’ id-dħul tiegħu u naqqas l-ispejjeż b’aktar minn £900 miljun sabiex jidher li kien qed jikkonforma mar-regoli finanzjarji.
Skont il-Premier League, is-City kienu rranġaw numru ta’ kuntratti kummerċjali “fittizji” ma’ sponsors, li ma kinux jirriflettu l-ftehimiet reali bejn il-partijiet.
Parti mill-finanzjament kienet allegatament ġejja minn Abu Dhabi United Group Investment & Development Ltd (ADUG), li kien is-sid tal-club. Il-kummissjoni sabet ukoll arranġamenti oħra li ppermettew lis-City jirreġistraw spejjeż operattivi aktar baxxi minn dawk li fil-fatt kienu qed iġarrbu.
Il-kummissjoni kkonkludiet li s-City ippreżentaw kontijiet li ma kinux jirriflettu b’mod korrett is-sitwazzjoni finanzjarja tal-club u ħbew l-istat reali tal-finanzi tagħhom mill-awdituri u mir-regolaturi tal-football. Hija sabet ukoll li l-club għamel sforzi biex iwaqqaf jew ifixkel l-investigazzjoni tal-Premier League.
Il-Kap Eżekuttiv tal-Premier League, Richard Masters, qal li d-deċiżjoni tistabbilixxi dak li seħħ fil-club u turi ksur sistematiku tar-regoli għal kważi għaxar snin. Huwa ddeskriva l-każ bħala l-aktar wieħed sinifikanti fl-istorja tal-Premier League, iżda qal li għad irid jiġi deċiż x’sanzjoni għandha tiġi imposta.
Manchester City, min-naħa tagħhom, ċaħdu l-akkużi u qalu li huma “innoċenti”. Il-Kap Eżekuttiv Ferran Soriano sostna li l-każ kollu huwa bbażat fuq akkuża waħda falza, jiġifieri li l-flus personali tas-sid ġew introdotti fil-club permezz ta’ sponsors minn Abu Dhabi. Huwa qal li l-club ippreżenta evidenza, inklużi rendikonti bankarji, trasferimenti u xhieda, li turi li dan ma seħħx.
Is-City qalu wkoll li se jappellaw kontra d-deċiżjoni, filwaqt li jsostnu li fiha żbalji materjali fil-liġi, fil-prinċipji u fil-fatti. Il-club għandu sat-2 ta’ Ottubru biex jippreżenta l-appell. Wara li l-akkużi ġew ippruvati, issa mistennija ssir seduta biex tiġi determinata s-sanzjoni.
