Minn Cristian Muscat
Sliema Wanderers …..3
Vittoriosa Stars ……..0
Sliema Wanderers ftit li xejn tħabtu biex għelbu l-isfida tat-team miċ-Challenge League, Vittoriosa Stars, bl-iskor ta’ 3-0 biex b’hekk kisbu l-passaġġ għar-round tal-Aħħar 16 tal-FA Trophy.
Huma dehru impostati ferm tajjeb f’kull dipartiment tal-ground, waqt li kuntrarju għal dan, il-Ġirbin dehru inferjuri u ftit li xejn inċiżivi fl-attakk.
Il-Wanderers rebħu penalty proprju fl-ewwel attakk denju fis-seba’ minuta meta Daniel Sowatey waqqa’ lil Juan Pablo Morales fil-kaxxa. Iżda mill-11-il metru Jean Goncalves ra t-tentattiv tiegħu jiġi milqugħ mill-goalkeeper Ryan Marmara.
Madankollu, fit-32 minuta, is-Slimiżi fetħu l-iskor permezz ta’ free-kick mill-isbaħ ta’ JUAN PABLO MORALES li ma ta l-ebda ċans lil Marmara jsalva.
Iżda fis-37 minuta, anke l-Ġirbin ingħataw penalty meta l-goalkeeper, Timmy Aquilina, waqqa’ lil Freud Gnindokponou fil-kaxxa.
Iżda x-xutt ta’ Ebenezer Ayorinde Tejumola mill-11-il metru ġie salvat parzjalment mill-istess Aquilina u mir-rebound l-attakkant Niġerjan xeħet barra … biex kien it-tieni penalty fallut tal-logħba.
Ta’ dan in-nuqqas, Vittoriosa pattew qares għax fil-45 minuta, il-Blues irduppjaw meta wara li rċieva minn cross mil-lemin, JAKE ENGERER, ikkonkluda bir-ras minn cross fuq il-lemin.
Fil-veritá, Sliema qatt ma dehru li setgħu jitilfu din il- logħba u fil-59 minuta free-kick ta’ Juan Pablo Morales għadda ftit barra.
Sussegwentament, konxji mill-vantaġġ li kellhom, huma naqqsu mir-rendiment tagħhom u l-partita pprogressat bħala waħda medjokri karatterizzata b’ħafna logħob f’nofs il-ground.
Fit-88 minuta, Jean Cloth Goncalves falla ċans tad-deheb li jagħmilhom tlieta għas-Slimiżi meta minn taħt il-lasti għamel l-impossibbli u xeħet barra.
Iżda fil-ħin miżjud huma ssiġillaw ir-rebħa minn daqqa ta’ ras preċiża mill-viċin tas-sostitut OMAR ELOUNI.
SLIEMA W.: 1-Timmy Aquilina, 3-Juan Pablo Morales Rengifo (77-Amamdou Pape Samb 81), 4-Raffaelo Schiavi, 5-Kurt Shaw, 6-Gabriel Aquilina, 7-John Mintoff, 10-Inters Gui (21-Danny Holla 70), 19-Jake Engerer (9-Omar Elouni 70), 25-Yuki Uchida (11-Ruslan Kisil 70), 72-Jean Carlos Cloth Goncalves, 99-Valmir Berisha (2-Luke Muscat 87) – Coach: Andrea Pisanu
VITTORIOSA S.: 88-Ryan Marmara (1-Matthew Bonanno 87), 5-Kyle Mercieca, 6-Evair Grech, 7-Ebenezer Ayorinde Tejumola, 8-Ali Oularbi (19-Mattias Formosa 70), 9-Ayrton Micallef, 13-Joseph Farrugia, 20-Daniel Sowatey (99-Glen Attard 87), 21-Leslie Bregman Quincy (45-Adrian Cutajar 87), 77-Erson Schembri, 87-Freud Gnindokponou (51-Edward Falzon 79) – Coach: Vince Carbonaro
REFEREE: Philip Farrugia
ASS. REFEREES: Duncan Sultana, Mark Ciantar
RABA’ UFF: Ezekiel Barbara
SKORERS: J. P. Morales 32, J. Engerer 45, O. Elouni 93 (SW)
AMMONITI: D. Sowatey (VS)
