Fgura United Football Club għadu kemm laħaq ftehim ma’ Foggia Calcio 1920 sabiex ikun hemm kollaborazzjoni reċiproka fuq bażi teknika. F’konferenza tal-aħbarijiet il-Ġimgħa wara nofsinhar fil-club ta’ Fgura United FC, il-president Larkin Bonnici tkellem f’aktar dettall dwar dan il-ftehim li se jkun qed jiffoka fuq prinċipji u ideoloġiji tekniċi u li minnu se jibbenefikaw il-coaches u l-players.
Talk.mt tkellem ma’ Bonnici fejn saħaq fuq il-fatt li dan il-ftehim hu iktar intiż li jkun wieħed tekniku u m’hemm xejn kummerċjali fih.
“Dan il-ftehim se jkun qed jaħdem fuq diversi binarji partikolari fosthom l-ambjent tekniku b’kowċis minn tagħna li se jkunu qed jagħmlu skambju fejn huma jmorru hemmhekk filwaqt li oħrajn minn Foggia Calcio jiġu hawnhekk.”
Sadanittant matul dan tmiem il-ġimgħa qed isiru diversi workshops minn tliet kowċis tat-tim Taljan u se jiffukaw fuq il-kors CPD (Continuous Professional Development) fejn dawk preżenti jaġġornaw ruħhom bl-aħħar metodi ta’ taħriġ.
“Tant kemm dan l-iskambju mhux kummerċjali li saħansitra ftaħnih anke għal coaches li qegħdin ma’ timijiet oħra. B’hekk huma jkollhom ukoll il-liċenzja tagħhom aġġornata.”
Bonnici qalilna li l-ħsieb se jkun li jkun hemm gruppi ta’ players fi ħdan Fgura United FC li jkollhom kampijiet ta’ taħriġ u anke jiġu organizzati partiti ta’ ħbiberija f’Foggia stess.
Fatt interessanti dwar dan it-team hu l-fatt li jagħfsu ħafna fuq l-aspett tekniku fosthom il-kunċett ta’ neuroscience fejn il-coaches jiffukaw fuq l-aspett mentali tal-plejer. Bonnici spjegalna aħjar dan il-kunċett.
“Bqajt mistagħġeb bid-dettall li jidħlu fih ċerti coaches. Eżempju ta’ dan hu meta player ikollu l-ballun. Dak il-ħin f’moħħ il-player jidħlu ħafna ħsibijiet..x’nagħmel inqassam il-ballun? Inżommu? Naqbeż player?”
Dawn huma kollha innovazzjonijiet li skont Larkin Bonnici qed jagħmlu dan l-isport dejjem aktar modern u interessanti.
“Illum il-football inbidel u qed jidħol ħafna l-aspett psikoloġiku barra dak fiżiku. Hemm ukoll l-analiżi tal-logħba li tant saret importanti u fuq kollox xi dettalji oħra li wara l-partita tkun tista’ tiflihom bir-reqqa. Huwa għalhekk li korsijiet bħal dawn jibbenefikaw mhux ftit il-coaches Maltin”
Fgura United FC għandhom l-esklussivita’ ta’ dan l-iskambju u stiednu coaches oħra minn clubs oħra sabiex jiġu għal dawn il-korsijiet minħabba l-importanza li tibqa’ aġġornat mal-aħħar żviluppi f’dan l-isport.
Foggia Calcio hu klabb li twaqqaf fl-1920 u jinsab ibbażat fir-reġjun tal-Puglia, fin-naħa t’isfel tal-Italja. Bħalissa hu jilgħab fis-serie C Taljana u bla dubju li l-aqwa snin tiegħu jibqgħu dawk tad-disgħinijiet meta t-team kien immexxi mill-coach magħruf Zdenek Zeman u li kważi wasal għall-kwalifikazzjoni fit-Tazza UEFA. Dak iż-żmien kellhom diversi plejers magħrufa fosthom Francesco Baiano, Igor Shalimov, Dan Petrescu u Roberto Rambaudi. Fis-snin ta’ wara t-team kellu t-tlugħ u l-inżul tiegħu u issa qed jissielet għall-post fis-Serie B.
