Intlaħaq Ftehim Kollettiv ġdid għall-perjodu 2026–2030 għall-impjegati tal-Aġenzija tal-Programmi tal-Unjoni Ewropea (EUPA), wara diskussjonijiet kostruttivi bejn il-Gvern u t-Taqsima tal-Union. Dan huwa meqjus bħala pass konkret ieħor li jkompli jsaħħaħ l-investiment fil-ħaddiema tas-settur pubbliku u l-istituzzjonijiet nazzjonali ewlenin.
Meta ħabbar dan il-ftehim, il-Ministru għall-Fondi Ewropej u l-Implimentazzjoni tal-Programm Elettorali, Stefan Zrinzo Azzopardi, qal li dan juri b’mod ċar l-impenn tal-Gvern li japprezza, isostni u jinvesti fil-ħaddiema tiegħu, partikolarment dawk li jaħdmu fil-qalba tal-impenn ta’ Malta mal-programmi Ewropej.
Il-Ministru spjega li l-impjegati tal-EUPA għandhom rwol ċentrali biex jappoġġjaw individwi, organizzazzjonijiet u entitajiet pubbliċi f’Malta u Għawdex, billi jgħinuhom jaċċessaw fondi Ewropej, isaħħu l-ħiliet, jibnu kapaċità istituzzjonali u jippromwovu l-inklużjoni soċjali.
“Dan il-ftehim jibgħat messaġġ ċar li l-ħaddiema li jamministraw u jappoġġjaw il-programmi Ewropej, li jiggwidaw lill-benefiċjarji, jimmaniġġjaw proġetti kumplessi, jiżguraw kontabbiltà u jimmassimizzaw l-impatt tal-fondi tal-UE, għandhom jiġu rrispettati u rikonoxxuti għall-valur li jġibu lejn pajjiżna,” qal il-Ministru Zrinzo Azzopardi.
Huwa żied li dan il-ftehim jallinja ruħu mal-viżjoni usa’ tal-Gvern li jpoġġi lill-persuna fiċ-ċentru tal-politika pubblika, billi jiżgura stabbiltà, żvilupp professjonali u kundizzjonijiet aħjar tax-xogħol fis-settur pubbliku, filwaqt li jagħraf ukoll ir-responsabbiltajiet dejjem jiżdiedu u n-natura teknika tax-xogħol tal-impjegati tal-EUPA.
Il-Ministru enfasizza li l-Aġenzija tal-Programmi tal-Unjoni Ewropea hija responsabbli mill-implimentazzjoni ta’ Erasmus+ u l-European Solidarity Corps, żewġ programmi ewlenin tal-UE li joffru appoġġ finanzjarju u opportunitajiet prattiċi għal tagħlim, taħriġ, mobilità, volontarjat u inizjattivi ta’ solidarjetà.
“Permezz ta’ Erasmus+ u l-European Solidarity Corps, l-EUPA tgħin eluf ta’ benefiċjarji kull sena—studenti, żgħażagħ, edukaturi, organizzazzjonijiet u komunitajiet—biex jiżviluppaw ħiliet u esperjenza li jsaħħu kemm lill-individwu kif ukoll lis-soċjetà b’mod ġenerali. L-investiment fil-ħaddiema tal-Aġenzija huwa għalhekk investiment fil-kapital uman ta’ Malta u fil-futur tagħha,” qal il-Ministru.
Huwa saħaq li l-Ftehim Kollettiv il-ġdid se jikkontribwixxi għal aktar stabbiltà, żamma tal-persunal u kapaċità organizzattiva, u jiżgura li l-Aġenzija tibqa’ mgħammra biex tkompli tagħti servizz ta’ kwalità għolja, tilħaq standards Ewropej u tlaħħaq mad-domanda dejjem tikber mill-benefiċjarji.
Temm billi rringrazzja lill-partijiet kollha involuti fin-negozjati għall-approċċ responsabbli u kostruttiv tagħhom, u nnota li d-djalogu soċjali jibqa’ pilastru ewlieni tal-politika tal-Gvern. Huwa tenna li l-Gvern se jkompli jinvesti fil-ħaddiema tiegħu mhux biss permezz ta’ impenji ta’ politika, iżda wkoll permezz ta’ ftehimiet konkreti li jirrikonoxxu l-kontribut u l-professjonalità tagħhom.
Ritratt: MFI
